बुटवल : माओवादी केन्द्रले लुम्बिनी प्रदेशका मुख्यमन्त्री लिला गिरीलाई दिएको समर्थन फिर्ता लिने भएको छ। एमालेबाट मुख्यमन्त्री बनेका गिरीलाई दिएको समर्थन फिर्ता लिन लागिएको माओवादी केन्द्रका नेताहरुले बताएका छन्।
राष्ट्रपति निर्वाचनसँगै केन्द्रमा फेरिएको सत्ता समीकरणअनुसार अघि बढ्न समर्थन फिर्ता लिने तयारी गरिएको उनीहरूको भनाइ छ। माओवादी संसदीय दलका नेता जोखबहादुर महराले सरकारलाई दिएको समर्थन फिर्ता लिने विषयमा छलफल भइरहेको जानकारी दिए ।
गिरी पुस २७ गते मुख्यमन्त्रीमा नियुक्त भएका थिए। सात दलका ५६ र २ स्वतन्त्र गरी ५८ सांसदको समर्थनमा पाएका गिरीले माघ ५ गते विश्वासको मत लिएका थिए। केन्द्रीय गठबन्धनले आजको बैठकमा निर्णय लिने र सोहीबमोजिम समर्थन फिर्ता हुने जनाइएको छ ।
मुख्यमन्त्री गिरीलाई विश्वासको मत दिएका माओवादी केन्द्र, जसपा र जनमत पार्टी सरकारमा छन्। नागरिक उन्मुक्ति पार्टी (नाउपा), लोकतान्त्रिक समाजवादी पार्टी (लोसपा), नेकपा एकीकृत समाजवादी (नेकपा एस) ले पनि सरकारबाहिर रहेर गिरीलाई समर्थन गरेका थिए। अहिले समीकरण फेरिएको छ। सरकारलाई समर्थन गर्ने यी दलअहिले विपक्षमा छन्।
एमाले र राप्रपाले मात्रै मुख्यमन्त्री आबद्ध दल एमालेलाई साथ दिइरहेको छ। माओवादी केन्द्रले समर्थन फिर्ता लिनेबित्तकै मुख्यमन्त्री गिरी अल्पमतमा पर्नेछन्। यसपछि उनले संवैधानिक व्यवस्थाअनुसार एक महिनाभित्र विश्वासको मत लिनुपर्नेछ। विश्वासको मत नपाए गिरी नेतृत्वको सरकार ढल्नेछ।
एमालेकै नेतृत्वमा सरकार बने त्यसले विश्वासको मत नपाए मात्र १६८ (५) अनुसार प्रदेशसभाको कुनै सदस्यको नेतृत्वमा सरकार बनाउने बाटो खुल्नेछ। लुम्बिनी प्रदेशसभा ८७ सदस्यीय छ। बहुमतका लागि ४४ मत आवश्यक पर्छ। केन्द्रीय समीकरणअनुसार सत्ता गठबन्धनमा कांग्रेसका २७, माओवादी केन्द्रका १०, जसपाका ३, जनमतका ३, लोसपाका ३, नागरिक उन्मुक्ति पार्टीका ४ जना प्रदेशसभा सदस्य छन्।
केन्द्रको सत्ता समीकरण यथावत् रहे मुखयमन्त्रीको पक्षमा एमालेका २९ जना र राप्रपाका ४ जना गरी ३३ जना मात्र सांसद देखिन्छन् ।
