नेपालगन्ज : ठगी मुद्दामा पक्राउ पुर्जी जारी हुँदा पनि पक्राउ नपरेका नेपालगन्ज उपमहानगरपालिकाका उपप्रमुख(उपमेयर) कमरुद्दिन राई धरौटीमा छुटेका छन् । सार्वजनिक न्याय विरुद्धको कसुरमा उनी विरुद्ध गत माघ १८ मा पक्राउ पुर्जी जारी भएको थियो ।
पक्राउ पुर्जी जारी भएपनि उनलाई बाँके प्रहरीले पक्राउ गर्न चाहेन । पक्राउ पुर्जी पाएर पनि प्रहरीले उनलाई पक्राउ नगरेको हो । पक्राउ पुर्जी जारी भएकै समयमा उपप्रमुख राई विभिन्न औपचारिक कार्यक्रम, निर्धक्कका साथ सहभागी भएका थिए ।
बाँके प्रहरीले कमरुद्दिनलाई पक्राउ गरि हिरासतमा राखेर घटनामाथि अनुसन्धान गर्नुपर्ने भएपनि त्यसो गरेन । सामान्यतया पक्राउ पुर्जी जारीपछि आरोपितलाई पक्राउ गरि अनुसन्धान गर्नुपर्छ । तर, राजनीतिक पहुँच र दवावमा बाँके प्रहरीले राईलाई पक्राउ नगरेको प्रहरीका एक उच्च अधिकारीले बताएका छन् ।
पूर्वमन्त्री समेत रहेका सर्वदेव प्रसाद ओझाले सार्वजनिक न्याय विरुद्धको कसुरमा दिएको मुद्दामा अदालतले कमरुद्दिनलाई पक्राउ आदेश दिएको हो । मनीषा एग्री कन्सर्न नेपालगन्जको तर्फबाट ओझाले ठगी कसुरमा मुद्दा हालेका थिए ।
सार्वजनिक न्याय विरुद्धको कसुरमा पक्राउ पुर्जी जारी भएर पनि ‘फरार अभियुक्त’ सरह रहेका उनलाई अदालतमा पेश गराइएको छ । उपमेयर राई बुधबार आफैँ जिल्ला प्रहरी कार्यालयमा हाजिर भएको पाइएको छ ।
स्रोतका अनुसार सोही दिन राई घर आएर रात बिताएका थिए । त्यसपछि प्रहरीले उपप्रमुख राईलाई बिहीबार अदालत समक्ष पेश गरेको थियो । अदालतमा पेश भएका उनलाई धरौटी लिएर छाड्ने अदालतले आदेश दिएको हो ।
जिल्ला प्रहरी कार्यालय बाँकेका प्रमुख(एसपी) सन्तोषसिंह राठौरले उपप्रमुख राई आफै प्रहरीकहाँ आएर आत्समर्पण गरेको र त्यसको भोलिपल्ट आदलतमा पेश गरिएको बताएका छन् । अदालत पेश भएकै दिनभर भएको बहसपछि जिल्ला अदालतका न्यायाधिश सनतचन्द्र लवटको इजलासले राईलाई एक लाख २० हजार धरौटी लिएर छाड्न आदेश दिएको हो ।
आदेशपछि राईले सोही दिन धरौटी बाफत एक लाख २० हजार नगद बुझाएर छुटेका छन् । धरौटी रकम बुझाएर छुटेका उनी विरुद्ध दर्ता भएको मुद्दाको छिनोफानो भएको छैन । अदालतले गर्ने फैसलासंगै उनको उपप्रमुख पद रहने वा नरहने तय हुनेछ ।
मनिषा एग्री कन्सर्न र भारतमा रहेको मनीषा एग्री बायो टेक कम्पनी प्रालि हैदराबाद बीच भएको सम्झौता अनुसार आयात हुने सामाग्रीको भन्सार क्लीरिङ्गको जिम्मेवारी पाएका राई विरुद्ध ठगीको मुद्दा परेको हो ।२०६२ सालदेखि २०६९ सालसम्म उनले भन्सार एजेन्टको रूपमा काम गरेका थिए ।
ओझाले राईले भन्सार एजेन्टका रूपमा काम गर्ने क्रममा भन्सार, क्वारिन्टिन र अदालत समेतलाई भ्रममा पारेको बताए । उनका अनुसार अनुसन्धानका क्रममा कमरुद्दिन राईको नागरिकता र अन्य कागजातमा बाबुको नाम फरक भएको पुष्टी भएको छ ।
नागरिकतामा बाबुको नाम ‘गोवरे कवडिया’ रहेको छ । यस्तै भारतबाट पैठारी गर्ने ‘मनिषा एग्री बायो टेक कम्पनी’ प्रालिको कागजातमा ‘अकबर अलि’ उल्लेख छ । स्थानीय तहको निर्वाचनमा जनता समाजवादी पार्टी(जसपा) को तर्फबाट नेपालगन्ज उपमहानगरपालिकाको उपप्रमुखमा उनी निर्वाचित भएका थिए ।
