नेपालगन्ज : नेपाली काँग्रेसका महामन्त्री गगन थापाले वर्तमान सरकारले परिणाम दिन सक्नुपर्ने बताएका छन् । १४ औं महाधिवेशनपछि नेपाली काँग्रेस बाँकेले नेपालगन्जमा शनिबार आयोजना गरेको प्रथम जिल्ला सम्मेलनलाई सम्बोधन गर्दै प्रमुख अतिथी समेत रहेका थापाले आमनागरिकहरु आत्तिएको बेलामा बनेको नयाँ सरकारले परिणाम दिन सक्नुपर्ने धारणा राखेका हुन् ।
मुलुकको आर्थिक अवस्थाप्रति अहिले धेरैले चिन्ता ब्यक्त गरिरहेको बताउँदै भने, ‘अर्थतन्त्रको अवस्था देखेर आम मानिसहरु नराम्रोसँग आत्तिएको अवस्था छ, हाम्रो अवस्था २०७० सालको जस्तो छैन, २०७४ सालको जस्तो पनि छैन, परिस्थिती धेरै फरक भइसकेको छ ।’
उनले अबको पाँच महिनाभित्र केही न केही राम्रो भएको महसुस गराउन सक्नुपर्ने बताए । सरकार स्थिर बनेपछि मात्र त्यसले परिणाम दिन सक्ने र स्थिर सरकारको लाभ आमजनता र नागरिकले पाउनुपर्नेमा जोड दिए । ‘मसँग पाँच वर्ष छ, मसँग बहुमत छ भनेर बस्ने न उसँग समयको सुविधा छ, न नागरिकसँग त्यो धैर्यता छ,’ महामन्त्री थापाले भने ‘दिनरात काम गरेर परिणाम दिन सकेनौं भने धैर्यताको बाँध टुट्छ ।’
अर्को प्रसंगमा उनले युद्धको नाममा जघन्य अपराध गर्नेले कुनैपनि नाममा छुट नपाउने प्रष्ट्याए । अहिले सरकारमा भएपनि नेपाली काँग्रेसले आफ्नो आधारभुत कुरा नबिर्सने बताए । ‘यो विषयको सन्दर्भमा सरकारले एउटा विधेयक दर्ता गरेको छ, नेपाली काँग्रेस यो विषयमा एकदम प्रष्ट छ, शान्ति प्रक्रिया नेपाली काँग्रेसको नेतृत्वमा सुरु भयो र यो प्रक्रियालाई टुंग्याउनुपर्नेमा एकदम प्रष्ट छ । अब धेरै अलमल गर्नु हुदैन भन्ने कुरामा प्रष्ट छ,’ उनले भने ‘तर यो भन्दै गर्दा हिजो त्यसलाई युद्ध भन्नुस्, हिंसाको समय भन्नुस् । युद्ध हिंसाको समयमा जसले स्वइच्छाचारी ढंगबाट हत्या गरेको छ, जघन्य अपराध गरेको छ । निर्मम यातना दिएको छ, त्यसले कुनैपनि नाममा छुट पाउँदैन, पाउनु हुदैन, हामी अहिले सरकारमा छौं । तर, नेपाली काँग्रेसले आफ्नो आधारभुत कुरा बिर्सदैन ।’
संसदमा रहेको उक्त विधेयकको संशोधनकर्ता आफु पनि रहेको भन्दै महामन्त्री थापाले भने, ‘हत्या गरिएको कतिपय विषयलाई पनि क्षमादान गर्न सकिन्छ भनेर ल्याएको विधेयकमा नेपाली काँग्रेसका म लगायत थुप्रै सांसदहरुले संशोधन राखेका छौं, त्यो संशोधन नभईकन कि जसले जघन्य अपराध गरेको छ, जसले स्वइच्छाचारी हत्या गरेको छ, त्यो हत्या गर्ने अपराध गर्नेले दण्डबाट मुक्ती पाउने कानुन नेपालको संसदले बनाउन पाउँदैन भन्ने कुरा हामी काँग्रैसको तर्फबाट प्रष्ट राखेका छौं ।’
महामन्त्री थापाले आगामी २०८४ सालको चुनावमा नेपाली काँग्रेस एक्लै लड्ने जिकिर गरे । ‘निर्वाचन पछाडी सरकार बनाउने वा गठबन्धन बनाउने कुरा स्वभाविक हो, तर निर्वाचन अगाडी नै जब तालमेल गर्न थाल्छौ, त्यसले प्रजातन्त्रलाई यति विकृत बनाउँछ, त्यसले नागरिकको छनोटलाई सिमित बनाउँछ,’ उनले थपे ।
चुनावमा गठबनधन गर्दा काँग्रैसले ५/६ लाख मत गुमाउनु परेको महामन्त्री थापाले बताए । गठबन्धन गर्दा भोलीका दिनमा पार्टीकै अस्तित्व नरहने डर भएको सुनाए । ‘चुनावको परिणाम आयो अब सकियो, अब आउँदो चुनावमा आफ्नो ताकतमा लड्ने हो भने देश ब्यापी रुपमा पार्टीलाई बलियो बनाउनुपर्छ,’ उनले भने ।
फरक प्रसंगमा महामन्त्री थापाले पार्टीको भातृ संस्थाबारे नयाँ ढंगले सोच्न जरुरी रहेको बताए । काँग्रेस बाँकेका सभापति नारायण प्रसाद गौडेलको सभापतित्वमा सम्पन्न सम्मेलनको उद्घाटन शत्रलाई विशिष्ट अतिथी एवम् काँग्रेसका केन्द्रिय सदस्य मैकुलाल बाल्मिकी, पार्टीका लुम्बिनी प्रदेश सभापति अमरसिंह पुन, राष्ट्रिय सभाका सचेतक अनिता देवकोटा, पुर्वमन्त्री एवम् काँग्रेस बाँकेका गजेन्द्र हमाल, नेपाली काँग्रेस बाँकेका पुर्वसभापतिकृष्णमान श्रेष्ठ, निर्वतमान सभापति किरण कोइराला, प्रदेश सभाका सांसदद्धय बादशाह कुर्मी र सञ्जुकुमारी चौधरी, संबिधान सभाका सदस्य अब्दुल हमिद सिद्धिकी 'भोला', कोहलपुर नगरपालिकाका मेयर पूर्णप्रसाद आचार्य, राप्ती सोनारी गाउँपालिका अध्यक्ष एवम् पार्टीका पुर्वजिल्ला सचिव तप्तबहादुर पौडेल, नेपाली काँग्रेस क्षेत्र नम्बर १ का सभापति पोषण केसी, क्षेत्र नम्बर २ का सभापति रमेशकुमार गुप्ता, महासमिति सदस्यद्धय टेकबहादुर खड्का र लक्ष्मीनारायण शाह, तरुण दलका पुर्वमहामन्त्री हुर्मत न्यौपाने, महिला संघ बाँकेका सभापति नारायणी रुपाखेती, नेपाल टे«ड युनियन काँग्रेस बाँकेका सभापति रामबहादुर मल्ल लगायतले सम्बोधन गरेका थिए ।
काँग्रेस बाँकेका सचिव सुधान्सु कोइरालाले सञ्चालन गरेको सम्मेलनमा उपसभापति गोपालप्रसाद अधिकारीले स्वागत गरेका थिए । उक्त सम्मेलनमा काँग्रेस बाँकेका पुर्वसभापतिहरु, पार्टीका महिला वडा सभापतिहरु, उत्कृष्ठ वडा सभापति, तत्कालिन माओवादी द्धन्द्धमा मारिएका ब्यक्तीका परिवार, प्रजातन्त्र सेनानी र उनका परिवारका सदस्यहरु लगायतलाई सम्मान गरिएको थियो ।
सम्मेलनमा सभापति गौडेलले आगामी वर्षमा गरिने पार्टीको नीति तथा कार्यक्रम प्रस्तुत गरेका थिए । सम्मेलनको बन्द शत्रले सचिव कोइरालाले प्रस्तुत गरेको सांगठनिक र कोषाध्यक्ष यज्ञबहादुर बस्नेतले प्रस्तुत गरेको आर्थिक प्रतिवेदनलाई पारित गरेको प्रवक्ता डिल्ली गिरीले जानकारी दिएका छन् ।
