नेपालगन्ज : गैरसरकारी संस्था महासंघ नेपाल बाँकेले सोमबार ९ औँ अधिबेशन गरेको छ । अधिवेशनको महासंघका केन्द्रीय अध्यक्ष रामप्रसाद सुवेदीले उद्घाटन गरे । उद्घाटन शत्रलाई सम्बोधन गर्दै उनले नागरिक समाज राष्ट्रिय गौरवको विष बन्नुपर्ने बताए । अध्यक्ष सुवेदीले सरकारले नागरिक समाजको भुमिकाको सम्मान गर्नुपर्नेमा जोड दिए ।
नेपालका हरक राजनीतिक र सामाजिक आन्दोलनमा नागरिक समाजको भुमिका अग्रणी रहदै आएको बताउँदै नेपालको सन्दर्भमा नागरिक समाज साझेदारी, खवरदारी र पहरेदारीको भुमिकामा रहेको दाबी गरे । नागरिक समाजलाई दिनप्रतिदिन काम गर्न असहज हुँदै गएको उनको भनाई छ ।
सरकारले गरेका राम्रा काममा साझेदारी र गलतका बिरुद्ध खवरदारी गर्दै आएको बताउँदै सुवेदीले देशमा गैससमैत्री वातावरण नभएको आरोप लगाए । हरेक परिवर्तनमा नागरिक समाजको भुमिका महत्वपूर्ण भएता पनि परिवर्तन पश्चात बिभिन्न तहका सरकारले नागरिक समाजलाई उपेक्षा गर्दै आएको सुबेदीले बताए ।
\विभिन्न बाहनामा समाज कल्याण परिषदले समेत नागरिक समाजलाई दुख दिदै आएको सुवेदीको भनाइ थियो । आपत विपदमा गैससहरुको जहिले आवश्यकता रहने तर अन्य कार्यमा गैससहरु उपेक्षित हुने, गैर नाफामुलक गैससहरुलाई नाफा कमाउने कम्पनि सरहको व्यवहार सरकारबाट हुँदै आएको छ, सुबेदीले भने, ‘सरकारको बेवास्ताको शिकार अव हामी कहिले सम्म हुने ? तसर्थ अव गैसस महासंघ देशव्यापी आन्दोलनमा जान्छ, जब सम्म गैससमैत्री बातावरण बन्दैन तब सम्म हामी आन्दोलन गर्छाैं ।’
महासंघ नेपाल लुम्बिनी प्रदेश अध्यक्ष सुशिला वेल्वासेले पछिल्लो समय नागरिक समाजका संस्थालाई बिभिन्न तहमा काम गर्न असहज हुँदै गएको बताइन् । गैरसरकारी संस्था महासंघ नेपाल बाँकेका संस्थापक अध्यक्ष किरण कोइरालाले मानव अधिकारको रक्षा र महिला सशक्तिकरणका लागि नागरिक समाजको भुमिका प्रशंसनिय रहेको धारणा राखिन् ।
महासंघ बाँके शाखाका पुर्वअध्यक्ष पुर्णलाल चुकेले समाजको विविध क्षेत्रको विकासका लागि गैससहरुको महत्वपुर्ण भुमिका रहेको भएपनी गैससहरुलाई डलरको खेति गर्ने भनेर आरोप लाग्ने गरेको बताए ।
शाखाका अध्यक्ष नमस्कार शाहको अध्यक्षतामा सम्पन्न कार्यक्रममा रेडक्रसका केन्द्रीय उपाध्यक्ष अजितकुमार शर्मा, बाँके शाखा सभापति गोवर्धनसिंह सम्झाना, गैसस महासंघ नेपाल बर्दियाका पूर्बअध्यक्ष कृष्णजंग शाह, महासंघ बाँकेका पूर्बअध्यक्ष तेज बिक्रम शाह, मानव अधिकार आयोग नेपालगन्जकी प्रमुख द्धारिका अधिकारी, इन्सेककी सरस्वती मल्ल लगायतले बोलेका थिए ।
कार्यक्रममा २ दशक भन्दा लामो समय गैससको माध्यामबाट समाजिक सेवामा सक्रिय रहदै आएका विभिन्न क्षेत्रका ६ जनालाई सम्मान गरिएको थियो । नेपाल रेडक्रस सोसाइटीका केन्द्रीय उपाध्यक्ष अजित कुमार शर्मा, बाँके शाखा सभापती गोवर्धन सिंह सम्झाना, गैर सरकारी संस्था महासंघ नेपाल बाँके शाखाका पुर्व अध्यक्ष पुर्णलाल चुके, बाँके युनेस्को क्लबका संरक्षक प्रवेज अली सिद्धिकी, महिला जागृती सेलकी अध्यक्ष लक्ष्मी श्रेष्ठ, महिला उपकार मञ्च कोहलपुरकी अध्यक्ष चन्द्रकला उप्रेतीलाई सामाजिक क्षेत्रमा दिएको योगदानको कदर गर्दै सम्मान गरिएको हो ।
यस्तै महासंघको संस्थागत विकासका लागि सहयोग गरेका बास नेपाल, प्लान इन्टरनेशनल, दलित महिला संघ बाँके, नेपालगन्ज उद्योग वाणिज्य संघका निवर्तमान अध्यक्ष नन्दलाल बैश्यलाई समेत सम्मान गरियो । गैसस महासंघ बाँकेका सचिव आशिष बर्माले सञ्चालन गरेको उक्त कार्यक्रममा उपाध्यक्ष चन्द्रप्रसाद तिमिल्सिनाले स्वागत गरेका थिए । अधिवेशनमा ३ सय बढी गैससकर्मीहरुको उपस्थिती रहेको बताइएको छ ।
