नेपालगन्ज : लुम्बिनी प्रदेश सभाका सांसद अम्बिका काफ्ले राज्यमा जघन्य अपराध न्यूनिकरण गर्न महिला अदालत निर्माण गर्नुपर्ने माग गरेकी छन् । लुम्बिनी प्रदेश सभामा विशेष समय लिएर बोल्दै जनता समाजवादी पार्टी(जसपा)की नेतृ समेत रहेकी सांसद काफ्लेले महिला अदालत निर्माण गर्न संघिय सरकारसँग समन्वयकारी भूमिका खेल्न प्रदेश सभाका सभामुखलाई आग्रह गरेकी हुन् ।
‘राज्यमा दिनहुँ दिन घट्दै आएका बलात्कार, महिला हिंसा, यौन दुब्र्यवहार, महिलाहरु सम्पत्तीको हकबाट बञ्चित र राज्यमा जघन्य अपराध न्यूनिकरण गर्न महिला अदालतको यथाशिघ्र निर्माण गर्न संघिय सरकारसँग समन्वय गर्न सभामुख समक्ष आग्रह गर्दछु,’ उनले भनिन् ।
द्धन्द्ध पीडित, बाल योद्धा, कोख रित्तिएका, बुवाआमाको हक, हजारौं हजार सिउँदो पुछिएका महिलाको हक, शिक्षा, स्वास्थ्य, रोजगारी सामाजिक सुरक्षा, आदी संरक्षणको पूर्ण जिम्मा राज्यले लिनुपर्ने बताइन् । प्रदेश सभा, सम्पूर्ण सरकारी एव्म गैरसरकारी निकायमा स्तनपान कक्ष अनिवार्य रुपमा हुनुपर्ने ब्यवस्था कार्यान्वयनका लागि आग्रह गरिन् ।
भिडियो हेर्नुस् :
अर्को प्रसंगमा काफ्लेले राज्यमा अहिले देखा परेको समस्या आर्थिक समस्या भएको र जसलाई तरलताको समस्या भनिदै आएको बताइन् । ‘किन यो जटिल अवस्थामा राज्य मौन छ ? समस्याको पहिचान र समाधानका लागि सभामुखको माध्यमद्धारा संघिय सरकारसँग समन्वय गरी यथाशिघ्र समस्या समाधान गरी ब्यापारीहरुलाई पुर्नजीवन दिनुहुन निवेदन पेश गर्दछु र आशावादी पनि छु,’ उनले भनिन् ।
गैरसरकारी संस्थामैत्री कानुनको तर्जुमा गर्नुपर्ने, गैरसरकारी संस्थाले गरेको योगदानको कदर गर्दै प्रदेश सरकारद्धारा कार्यविधि बनाउनुपर्ने, गैरसरकारी संस्थालाई भ्याटमा जान बाध्य नपार्नुपर्ने, समाजकल्याण परिषदद्धारा गैरसरकारी संस्थालाई नविकरण, अनुगमनका नाममा समस्या सिर्जना भएको भन्दै उक्त समस्या समाधानका लागि प्रदेश सरकारले पहल गर्नुपर्ने माग गरिन् ।
सहकारी ऐन २०७४ संशोधनका साथै सहकारी क्षेत्रका समस्या समाधानका साथ सम्भावनालाई अगाडी बढाउनका लागि प्रदेश सरकार समक्ष सांसद काफ्लेले आग्रह गरेकी छन् ।
