बाँके (राप्ती सोनारी) : लुम्बिनी प्रदेशका प्रदेश सभा सदस्य डिल्लीबहादुर चौधरीले दहित थारु समुदायले महिलालाई सबैभन्दा बढी अधिकार दिएको बताएका छन् । बाँकेको राप्ती सोनारी गाउँपालिका वडा नम्बर ६ मा शनिबार आयोजित चौथो राष्ट्रिय दहित गोट्यार सम्मेलनलाई सम्बोधन गर्दै उनले दहित थारु समुदायमा घरको देवता पुज्ने अधिकार महिलालाई मात्र भएको बताए ।
उनले अब सामाजिक र राजनीतिक अधिकार पनि महिलालाई दिन आवश्यक रहेको बताए । लुम्बिनी प्रदेशका पूर्वशहरी विकास मन्त्री समेत रहेका चौधरीले दहित दहितबीच बिवाह गर्न नहुने कुरामा ठूलो रहस्य रहेको बताए ।
विभिन्न थरीका दहित बीच पनि विवाह गर्दा हाड नाता भएर वंशानुगत सिकलसेल रोग जस्ता विभिन्न रोग लाग्न सक्ने बारे दहितका पूर्खाहरु पहिले नै सचेत रहेकोले दहितबीच विवाह गर्न नमिल्नेमा जोड दिए । दहितहरुमा ठूलो सानो कोही नभएर सबै दहित बराबर रहेको चौधरीले बताए ।
स्वाथ्य उपचारका लागि काठमाडौमा रहेका पूर्वमन्त्री महेश दहितले अनलाईन मार्फत सम्मेलनलाई सम्मोधन गरेका थिए । ‘पहिचान बचाई, हैस्यार बनि ओ एक हुई’ भन्ने नारा सहित दहित गोट्यार सम्मेलन बाँकेको आयोजनामा भएको हो ।
सम्मेलनको प्रमुख अतिथी राष्ट्रिय खानेपानी संस्थानका निवर्तमान अध्यक्ष जीउलाल दहितले उद्घाटन गरेका थिए । आयोजक दहित गेट्यार सम्मेलन नेपाल बाँकेका संयोजक गोविन्द दहितको सभापतित्वमा जारी सम्मेलनमा नागरिक उन्मुक्ति पार्टीका लुम्विनी प्रदेश सदस्य सोमराज थारुले सम्मेलनको उद्देश्यबारे प्रकाश पारेका थिए ।
उक्त सम्मेलनमा, कैलारी गाउँपालिका उपाध्यक्ष भगवती दहित, संविधानसभा सदस्य पट्टु दहित, स्थानिय जनप्रतिनिधी लगायत दाङ, बाँके बर्दिया, कैलाली, कञ्चनपुर र सुर्खेतका दहितहरुको सहभागिता रहेको छ । थारु समुदायभित्र विभिन्न थर रहेकाले दहितभित्र पनि ४१ थरी पत्ता लागेको सम्मेलनमा उपस्थित दहितहरुको भनाई छ ।
सम्मेलनमा लेखक शेखर दहितले दहितहरुको पहिचान, अवस्था, वंशानुगत गुणलगायतका विषयमा कार्य पत्र प्रस्तुत गर्दै हाल नेपालको कुल जनसंख्या मध्य २ लाख ४३ हजार ५५१ दहितहरुको संख्या रहेको बताए । थारु आयोगले २०७७ सालमा संकलन गरेको तथ्यांकमा ३७ थरीका दहित सुचिकृत भएपनि ४१ थरीका दहित रहेको उहाँको दहितको दावी छ । अन्य थारु भन्दा दहित थारु हरु तिखो दिमाग भएका, सामाजिक नेतृत्व सृजनसिल, दहितभित्र धेरै थरी रहेपनि दहित-दहित बीच विवाह गर्दा हाडनाता पर्ने भएकाले थर पहिचान गर्न अति आवश्यक रहेको उनले बताए ।
उक्त सम्मेलनमा उपस्थित विभिन्न थरीका दहितहरुले भोज विवाह, मर्नी कर्नी र पूजा आँटीमामा गरिने रितिरिवाजबारे आ–आफ्नो भनाई राखेका थिए । सम्मेलनमा राप्ती सोनारी गाउँपालिकाका संस्थापक अध्यक्ष लाहुराम थारु, वडा नम्बर ६ का वडा अध्यक्ष लवराज खरेल, वडा नम्बर ७ का वडाअध्यक्ष रामलखन थारु लगायतका बक्ताले शुभकामना मन्तब्य दिएका थिए । कार्यक्रमको सहजी करण नुरी कुमारी दहितले गरेकी थिइन् । -रेडियो भूवर भवानी डटकमबाट
