नेपालगन्ज : तेस्रो नेपालगन्ज फोटो फेस्टिवल शनिबार समापन भएको छ । अन्तरालको आयोजनामा शुक्रबार उक्त फेस्टिवल सुरु गरिएको थियो । समापन कार्यक्रममा फोटो फेस्टिवलका विजेतालाई पुरस्कृत गरियो ।
समापन कार्यक्रमका प्रमुख अतिथी एवम् राष्ट्रिय खेलकुद परिषद(राखेप)का सदस्य सचिव टंकलाल घिसिङ, राखेप सदस्य अन्जन धमला, केलएल दुगड ग्रुपका प्रमुख कार्यकारी अधिकृत प्रदिप छाजेड, आयोजक अन्तरालका प्रमुख कार्यकारी जयनारायण शाह, फेस्टिवल निर्णायक टिमका संयोजक विकास कार्की र रमेश मल्लले विजेतालाई पुरस्कृत गरे ।
‘वर्ष फोटो’ विजेता मुगुका पत्रकार राज बहादुर शाहीलाई नगद २५ हजार ५ सय ५५ रुपैयाँ सहित प्रमाणपत्र प्रदान गरियो । यस्तै फेस्टिवलमा खेलकुद विधाका विजेता सत्यम जोशी, पर्यटन विधाका विजेता सृजना ओली, सँस्कृती तर्फका विजेता बबि साई, प्रकृति र संरक्षण तर्फको विजेता श्रीराम खत्री, दैनिक जीवनतर्फ मनोज पौडेल, कृषितर्फ राजबहादुर शाही, नेपाल स्माईल र समाचार विधाका विजेता अंगद ढकाललाई जनही नगद पाँच हजार र प्रमाणपत्र प्रदान गरिएको थियो ।
प्रमुख अतिथी घिसिङले नेपालगन्जलाई राष्ट्रिय स्तरमा चिनाउन फोटो फेस्टिवलले थप सहयोग गरेको बताए । ‘नेपालगन्ज हरेक विधामा उत्तिकै अब्बल छ, खेलकुदका लागि त झन नेपालगन्ज महत्वपुर्ण शहर हो, फोटो फेस्टिवलमा नेपालगन्ज अगाडी भएको यसले देखाउँछ,’ उनले भने ।
फोटोले वास्तविक सन्देश दिने भएकोले यसको महत्व धेरै हुने गरेको सदस्य सचिव घिसिङले बताए । ‘शब्दहरु लेख्दा सबै कुरा नआउन सक्छ, अथवा आएका कुराहरु केहि फरक भएर आउन सक्छन, तर फोटोमा त्यस्तो हुँदै यर्थात कुरा फोटोले बोल्छ, त्यसले फोटो फेस्टिवल जस्तो महत्वपुर्ण कार्यक्रममा सहभागि हुन पाउँदा मलाई खुसी लागेको छ,’ उनले भने ।
वर्ष फोटो विजेता शाहीले दुर्गम क्षेत्रमा बसेर पत्रकारिता गर्न निकै कठिन रहेको भन्दैं फेस्टिवलको विजेता बन्दा आगामी दिनमा आफनो क्षेत्रमा काम गर्न थप हौसला मिलेको बताए । आयोजक अन्तरालका कार्यकारी निर्देशक शाहले विषम परिस्थितीका बाबजुद पनि फेस्टिवललाई निरन्तरता दिइरहेको बताए । उनले आगामी दिनमा यसलाई अझै परिस्कृत गर्दै लग्ने प्रतिवद्धता ब्यक्त गरे ।
उक्त फेस्टिवलमा फोटो प्रतियोगिताबाट छानिएका ८ विधाका १ सय १५ फोटोहरु र बाँके जिल्लाका ‘एक से एक’ फोटोहरु प्रदर्शनीमा राखिएको थियो । फेस्टिवललाई करिव ३ हजार जनाले अवलोकन गरेको आयोजकले जनाएको छ ।
उक्त फेस्टिवलको नेपाली कांग्रेसका सह-महामन्त्री एवम् प्रतिनिधि सभाका सांसद किशोरसिंह राठौरले उद्घाटन गरेका थिए । फोटो फेस्टिवलमा रक्षक सेक्युरिटी, बास नेपाल र नेपालगन्ज ग्यालरीले सहकार्य गरेका थिए । फेस्टिवलको फोटो प्रतियोगितामा डेलि लाईफ, कल्चर, टुरिजम, नेचर एण्ड कन्जरभेसन, स्र्पोट्स, नेपाल स्माईल, एग्रीकल्चर र न्युज विधामा करिव दुई हजार फोटो समावेश गरिएको थियो ।
