नेपालगन्ज : पुर्वराष्ट्रिय फुटबल खेलाडी विवेक जंग शाह (एमबीई) आफ्नो गृहजिल्ला बाँकेमा सम्मानित भएका छन् । बाँके जिल्ला फुटबल संघले उनलाई शुक्रबार सम्मान गरेको हो ।
अखिल नेपाल फुटबल संघ(एन्फा) का केन्द्रिय सदस्य भोजराज शाही, बाँके जिल्ला फुटबल संघका महासचिव कमल खत्री, फुटबल प्रशिक्षक सानु तामाङ, रबिन्द्र श्रेष्ठ लगायतले सम्मान गरे । उत्कृष्ठ काम गरेका कारण शाह बेलायती महारानीबाट सम्मानित समेत भएका थिए ।
नेपालगन्जबाट फुटबल करियर सुरु गरेका शाहले २०५४ सालमा नेपालको यु–१६ फुटबल टिम, नेपालगन्ज–११ टिम र अन्य विभिन्न क्लवबाट व्यवसायिक फुटबल खेलेका थिए । शाह अहिले बिट्रिस आर्मीमा क्याप्टेनका रुपमा कार्यरत छन् । शाहले भारतको बहराइचमा भएको स्टेट स्तरको फुटबल प्रतियोगितामा निर्णायक गोल गर्दै नेपालगन्ज–११ लाई उपाधि दिलाएका थिए ।
नेपालगन्ज उपमहानगरपालिका वडा नम्बर ४ देवाफुलबारीका शाहले सन् २००१ मा भएको तत्कालिन राजा बीरेन्द्रको शुभ जन्मोत्सवमा हुने बर्डे कपमा नेपालगन्ज–११ को तर्फबाट जावला खेल फुटबल क्लबलाई हराएर क्वारटर फाइनलमा पुग्दा निर्णायक गोल गरेकाथिए । नेपालगन्ज लाई आधा दर्जन महत्वपुर्ण प्रतियोगितामा सफलता दिलाउने खेलाडीमा पर्छन् शाह ।
फुटबल करियरमा बाँके जिल्लाको प्रतिष्ठालाई बढाउने काम गरेकोले यस क्षेत्रका लागि विवेक प्रतिष्ठित व्यक्ति भएको एन्फा केन्द्रिय सदस्य शाहीले बताए । उनले भने, ‘विवेक बाँके जिल्लाको फुटबल इतिहासमा एउटा उदाहरणीय खेलाडी हुन्, उनले बेलायतमा गएर पनि आफनो देश र जिल्लालाई गर्व हुने सफलता हासिल गरेका छन् ।एउटा खेलाडीले यो स्तरमा सफलता प्राप्त गर्नु फुटबल परिवारका निम्ति गर्वको विषय हो ।’
शुक्रबार बाँके जिल्ला फुटबल संघका पदाधिकारी र पुर्व राष्ट्रिय खेलाडी शाहका बीच बाँकेको फुटबल विकास गर्ने बारेमा छलफल भएको छ । नेपालगन्जमा आउँदा फुटबल संघका पदाधिकारीहरु सँग भेट्न पाउँदा खुसी लागेको शाहले बताए ।
उनले भने, ‘यो न्यानो आतिथ्य र सम्मानका लागि बाँके जिल्ला फुटबल संघलाई धन्यवाद दिन चाहन्छु । फुटबल मलाई मन पर्ने खेल हो । यसको विकासका लागि म सक्दो सहयोग गर्छु । विशेष गरी नयाँ बाल बालिकालाई फुटबल खेल्न प्रेरित गर्नु पर्छ । यस्तो अभियानमा संघले योजना बनाएको कुरा थाहा पाउँदा खुसी लाग्यो । फुटबलको विकासमा सबैको सहकार्य र समन्वय आवश्यक छ ।’
बाँके जिल्ला फुटबल संघले चौथो नेपालगन्ज गोल्ड कप र बालबालिकाको लागि ग्रासरुट फुटबल प्रशिक्षण कार्यक्रम सञ्चालन गर्ने तयारी गरिरहेको छ । त्यसमा शाहले सहयोग गर्ने प्रतिवद्धता जनाएका छन् । सम्मान कार्यक्रममा ब्रिटिस आर्मी समिर मल्ल, बाँके जिल्ला फुटबल संघका सदस्य ईश्वर चन्द पनि उपस्थित भएका थिए ।
