नेपालगन्ज : नेपाली काँग्रेसका उपसभापति धनराज गुरुङले अहिलेको चुनौतीलाई सामना गर्न नसके मुलुकमा कुनैपनि पार्टी रहन नसक्ने बताएका छन् । ‘इतिहासको काल खण्डमा मात्र पार्टीहरु दर्ज हुने कि चुनौतीको सामना गर्ने ? इतिहासको पानामा मात्रै राजनीतिक पार्टी सिमित हुने होईन, चुनौतीको सामना गर्नुपर्छ,’ नेपाल टे«ड युनियन काँग्रेस बाँकेको ७ औं जिल्ला अधिवेशनलाई सोमबार नेपालगन्जमा सम्बोधन गर्दै प्रमुख अतिथी गुरुङले भने ।
प्रतिकुल परिस्थिती र चुनौतीबाट काँग्रेस पार्टी नभाग्ने उनले प्रष्ट्याए । अहिले मुलुकको आर्थिक अवस्था प्रतिकुल भएपनि काँग्रेसले त्यसको सामना गरेर अगाडी बढ्ने नेता गुरुङको धारणा छ । उनले थपे, ‘प्रतिकुल परिस्थितीलाई अनुकुल बनाउनको लागि काँग्रेस स्थापना भएको हो, अहिले राजनीतिक प्रतिकुल परिस्थती होइन, आर्थिक प्रतिकुल परिस्थिती छ, काँग्रेस आर्थिक चुनौतीबाट भाग्दैन, राम्रोसँग सामना गर्छ, नत्र हामीले किन राजनीति गर्ने ? वर्तमानको चुनौतीलाई काँग्रेसले सामना गर्नुपर्छ ।’
आफुहरु विपी कोइरालाको अनुयायी भएको बताउँदै उपसभापति गुरुङले भने, ‘२००३ सालमा यो मुलुकभित्र पार्टी गठन गर्ने अवस्था थिएन, त्यस्तो प्रतिकुल परिस्थितीमा पनि विपी कोइरालाले २००३ सालमा पार्टी स्थापना गर्नु भएको हो, यदी प्रतिकुल अवस्था छ भनेर डराएको भए काँग्रेस पार्टी स्थापना हुने थिएन ।’
पछिल्लो राजनीतिक परिस्थितीलाई लिएर काँग्रेसकै जिल्लादेखी केन्द्रका नेताहरुले काँग्र्रेस सच्चिने कि सक्किने ? भन्ने गरेको प्रसंगमा उनले आफैलाई सच्याउन काँग्रेसका नेता, कार्यकर्तालाई आग्रह गरे । नेतालाई गाली गरेर मात्र ठुलो नेता नहुने उनको धारणा छ ।
पछिल्लो समयमा केही ब्यक्तीले पार्टी छाडेर गएकोतर्फ संकेत गर्दै उपसभापति गुरुङले एक दुई जनाले छाड्दैमा केही फरक नपर्ने बताए । अर्को प्रसंगमा उनले ठुला नेताको सम्पत्ती छानविन गरेपछि मात्र यो देशमा भ्रष्टाचार नियन्त्रणमा आउने बताए ।
‘ठुला नेताको सम्पत्ती छानविन गर्नुपर्छ भनेर मैले केन्द्रिय समिति बैठकमा कुरा राखेको हु, त्यो मेरो प्रस्ताव मान्देको भए अहिले देशभर काँग्रेसको राम्रो प्रभाव हुन्थ्यो, म आज पनि भन्दैछु, त्यो अडानमा छु,’ उनले भने ‘ठुला नेताहरुको सम्पत्ती छानविन गर्नैपर्छ, कोही नेता डराउँछ भने धनराज गुरुगको सम्पत्ती छानविन गरेर यो कामको सुरुवात गरौं ।’ कालो धन जति अन्यत्रै थुप्रिएका कारण बैंकमा पैसा नभएको बताए ।
