कता फरार भए पुर्वउपप्रधानमन्त्री टोपबहादुर रायमाझी ?

राजनीति

Home
राजनीति
कता फरार भए पुर्वउपप्रधानमन्त्री टोपबहादुर रायमाझी ?

कता फरार भए पुर्वउपप्रधानमन्त्री टोपबहादुर रायमाझी ?

काठमाडौं : नक्कली भुटानी शरणार्थी बनाएर ठगी गरेको प्रकरणमा पक्राउ पुर्जी जारी भएका नेकपा (एमाले) का सचिव एवं प्रतिनिधि सभाका सदस्य टोपबहादुर रायमाझी फरार भएका छन् ।

प्रहरीका अनुसार बुधबार पक्राउ पुर्जी जारी भएका उनी बिहीबार प्रहरी कार्यालयमा उपस्थित हुने प्रहरीको अपेक्षा गरिएपनि बिहीबार साँझबाट फरार भएका हुन् । गृहजिल्ला अर्घाखाँचीमा भएको एउटा कार्यक्रम सकेर बुधबार बेलुकी उनी बुटवल झरेका थिए ।

आफूविरूद्ध पक्राउ पुर्जी जारी भएपछि उनले सञ्चारकर्मीलाई प्रतिक्रिया दिदै अनुसन्धानमा सहयोग गर्ने बताएका थिए । तर पछिल्लो समयमा उनको मोबाईलको स्विच अफ रहेको र फरार रहेको प्रहरीको उच्च स्रोतले जनाएको छ ।

रायमाझी बुधबार बुटवल बस्ने भन्दै एउटा होटलमा कोठा समेत रोकेका थिए । उनले बुधबार राति नै भैरहवाबाट काठमाडौंका लागि जहाजको टिकट लिएका थिए । तर पछि उनले होटलको कोठा र जहाजको टिकट रद्द गरेर सम्पर्कविहीन भएको रूपन्देही प्रहरीले जनाएको छ ।

प्रहरीले उनको खोजी गरिरहेको जनाएको छ । रायमाझीको फोटो राखेर मानिस हराएको सूचना भन्दै सामाजिक सञ्जाल प्रयोगकर्ताहरुले ब्यंग्यात्मक रुपले पोष्ट गरिरहेका छन् ।

प्रकाशित मिति: शुक्रबार, वैशाख २२, २०८० २२:१७

प्रतिक्रिया दिनुहोस्