नेपालगन्ज : वर्षौपछि पहिलो पटक पाएका मन्त्रीलाई छोटो समयमै गुमाउनु पर्दा बझाङ जिल्लाबासी यतिबेला शोकमा डुबेका छन् । बझाङमा भएको सवारी दुर्घटनामा परी सुदूरपश्चिम प्रदेशका आन्तरिक मामिला तथा कानुनमन्त्री पृथ्वीबहादुर सिंह मंगलबार गम्भिर घाइते भएका थिए ।
नेपालगन्ज मेडिकल कलेज शिक्षण अस्पताल कोहलपुरमा उनको उपचारका क्रममा अपरान्ह अपरान्ह ५ बजेर ३३ मिनेटमा निधन भएसँगै बझाङ जिल्ला शोकमा डुबेको हो । मुलुक संघीयता गएपछि संघ र प्रदेशमा बझाङ जिल्लाबाट कोही पनि मन्त्री भएका थिएनन् ।
गत जेठ ५ गते सिंह सुदूरपश्चिम प्रदेश सरकारको आन्तरिक मामिला तथा कानून मन्त्री नियुक्त भएका थिए । गत मंसिर ४ गते भएको प्रदेश सभा निर्वाचनमा बझाङ क्षेत्र नम्बर १(१) बाट उनी निर्वाचित भए । सुदुरपश्चिम प्रदेशमा सरकार गठन भएपछि उनी नेपाली काँग्रेसको प्रतिनिधित्व गर्दै आन्तरिक मामिला तथा कानुन मन्त्रीको जिम्मेवारीमा पुगेका थिए ।
२०१५ साल माघ १७ गते बझाङको तत्कालीन लुयाटामा बुबा मानबहादुर सिंह र आमा तारादेवी सिंहका कोखबाट उनको जन्म भएको हो । पाण्डु प्राथमिक विद्यालय र घचाया प्राथमिक विद्यालय हुँदै सत्यवादी माध्यमिक विद्यालयबाट उनले एसएलसी पूरा गरेका थिए । उनले बीएल महेन्द्र बहुमुखी क्याम्पस नेपालगन्जबाट पुरा गरेका थिए ।
सिंहले कानुनकै विद्यार्थी भएकाले प्रदेशको हित हुने नीति निर्माणमा जोड दिने बताउँदै आएका थिए । २०३१ सालमा एसएलसी सकेर नेविसंघमा उनी आवद्ध भएका थिए । उनी नेपालगन्ज हुँदा २०३५ सालतिर महेन्द्र बहुमुखी क्याम्पसमा स्ववियु सभापति पनि भएका थिए । त्यसैबेला उनी नेविसंघको जिल्ला कार्यसमिति सचिव बनेका थिए ।
२०४९ सालमा उनी तत्कालीन लुयाटा गाउँविकास समितिको अध्यक्ष समेत भएका थिए । २०५४ अघि दुई कार्यकाल नेपाली कांग्रेसको बझाङ जिल्ला सचिव भएका मन्त्री सिंह २०५४ सालमा तत्कालीन जिल्ला विकास समितिको सभापतिको उम्मेदवार भएर हारेका थिए । त्यसपछि १२ वर्ष नेपाली कांग्रेस बझाङको सभापतिमा तीन कार्यकाल जिम्मेवारी बहन गरेका थिए ।
पार्टीको महाधिवेशन प्रतिनिधि हुँदै महासमिति सदस्य समेत रहेका सिंहले २०७४ सालमा बझाङबाटै प्रतिनिधि सभा सदस्य पदको चुनाव लडेपनि पराजित हुन पुगे । २०७९ मंसिरमा सम्पन्न प्रदेश सभा सदस्य निर्वाचनमा प्रत्यक्षबाट निर्वाचित भएका सिंहले बझाङको विकासका लागि आवाज उठाउँदै आएका थिए ।
उनको निधनले नेपाली कांग्रेसलाई पनि ठुलो क्षति पुगेको छ ।
आफ्ना नेतालाई गुमाउनु पर्दा बझाङका काँग्रेस नेताहरू स्तब्ध भएका छन् । कांग्रेस जिल्ला सचिव झलक कठायतले सरकारको मन्त्री मात्रै नभएर बझाङका जनताका बीचमा अत्यन्तै लोकप्रिय नेता गुमाउनु पर्दा निकै पीडा महसुस भइरहेको बताए ।
उनले भने, ‘नागरिकबीच नजिकको सम्बन्ध बनाएर हिँड्न सक्ने, पार्टीलाई यहाँसम्म पुर्याउन तीन दशकदेखि मेहनत गरेका नेता गुमाउनु पर्दा हामीहरु टुहुरो भएको महसुस गरेका छौ ।’ नेता सिंह जस्ता त्यागी र मेहेनती नेता अब जिल्लाले कहिल्यै पाउन नसक्ने उनको भनाई छ ।
सम्बन्धित समाचार पढ्नुस् :
सुदूरपश्चिमका आन्तरिक मामिला मन्त्री सिंहको निधन
सुदुरपश्चिमका आन्तरिक मामिला मन्त्री सिंहको गाडी दुर्घटनाग्रस्त
