सल्यानकी घाइते सुनितालाई २ लाख २० हजार सहयोग

समाज

Home
समाज
सल्यानकी घाइते सुनितालाई २ लाख २० हजार सहयोग

सल्यानकी घाइते सुनितालाई २ लाख २० हजार सहयोग

काठमाडौँ : सल्यानमा भएको दुर्घटनाबाट घाइते भएर लामो समयदेखी उपचार गराइरहेकी सुनिता पुनलाई २ लाख २० हजार रुपैयाँ आर्थिक सहयोग गरिएको छ । अमेरिका र कोरियामा रहेका नेपालीले पठाएको सहयोग रकम भौतिक पूर्वाधार तथा यातायातमन्त्री प्रकाश ज्वालाले हस्तान्तरण गरेका हुन् ।

सुनिताका पति राजेशलाई काठमाडौंस्थित ट्रमा सेन्टर पुगेर मन्त्री ज्वालाले हस्तान्तरण गरेका थिए । सल्यानी समाज दक्षिण कोरियाका वसन्त राना, टासिङ पुन, भीमराज बुढाथोकीले १ लाख ५५ हजार र नेपालगन्ज निवासी बिमलकुमार चन्दको पहलमा अमेरिकाको भर्जिनियामा रहेका जुली ओली र प्रदीप घर्तीले पठाएको ६५ हजार मन्त्री ज्वालाले हस्तान्तरण गरे ।

सल्यानको कुमाख गाउँपालिका वडा नम्बर ७ जिमाली घर भएकी सुनिता गतवर्ष असोज १५ गते गाडी दुर्घटनामा परी गम्भीर घाइते भएकी थिइन् । सामान्य उपचारपछि थप उपचारका लागि उनलाई भारत लगिएको थियो । तर, आर्थिक अभावमा उनीहरु फर्किएका थिए ।

केही समय अगाडि उपचार अभावमा रहेकी सुनितालाई बोकेर श्रीमान राजेश जिल्ला प्रशासन कार्यालय सल्यान पुगेको फोटो सार्वजनिक भएपछि मन्त्री ज्वालाको पहलमा ट्रमा सेन्टरमा लगेर भर्ना गरिएको थियो । गाडी समितिले समेत उपचारमा बेवास्ता गरेपछि राजेशले आफ्नो जग्गा, जमिन बेचेर उपचार गराउन बाध्य भइरहेका छन् । नेपालगन्जस्थित न्युरो अस्पतालमा श्रीमतिलाई भर्ना गरेका राजेशको दुःख, पीडालाई पहिलो पटक दूरसञ्चार डटकमले बाहिर ल्याएको थियो ।

यो पनि पढ्नुस् :

यातायात समितिले बेवास्ता गरेपछि श्रीमतीको उपचारमा सम्पत्ती रित्याउँदै राजेश

प्रकाशित मिति: बिहीबार, असार ७, २०८० ०८:४१

प्रतिक्रिया दिनुहोस्