कोहलपुर : कोहलपुरको एक बिद्यालयमा पढ्ने बिद्यार्थीको भविष्यमाथी गम्भिर खेलवाड गरिएको छ । बिद्यालय प्रशासन र उच्च माध्यामिक शिक्षा परिषदको चरम लापरबाहीले कोहलपुर नगरपालिका वडा नम्बर २ स्थित लक्ष्मी माध्यामिक बिद्यालयको आइएस्सी.एजी. समुहका बिद्यार्थीले ट्रान्सक्रिप्ट नै नपाएका हुन् ।
उक्त बिद्यालयको कक्षा ११ र १२ को १/१ सय पूर्णाङ्कको नेपाली र अंग्रेजी दुवै बिषयको पढाई हुनुपर्नेमा बिद्यालय प्रशासन र उच्च माध्यामिक शिक्षा परिषदले जानकारी नगराउँदा नेपाली बिषयको पढाई नै भएन् । सम्बन्धित विषयको पढाई नहुँदा बिद्यार्थीहरु अहिले ट्रान्सक्रिप्ट पाउनबाट बञ्चित हुनु परेको हो ।
बिद्यालय प्रशासन र उच्च माध्यामिक शिक्षा परिषदले बिद्यार्थीको भबिष्यलाई अन्धकारतर्फ लैजान खोजेको भन्दै अहिले बिद्यार्थी, अभिभावक तथा विभिन्न निकाय आक्रोशित भइरहेका छन् । बिद्यालय प्रशासन र उच्च माध्यामिक शिक्षा परिषदको लापरबाहीले उक्त समुहका सबै बिद्यार्थीले एक वर्षसम्म ब्यर्थै समय कुर्नुपर्ने अवस्था आएको एक अभिभावकले सुनाए ।
‘बिद्यालय प्रशासन र उच्च माध्यामिक शिक्षा परिषदको चरम लापरबाहीको सजाय अवोध बिद्यार्थीले खेप्नु परेको छ, यसको सत्य तथ्य छानविन गरी दोषीमाथी कारबाही गरियोस्,’ उनले भने । उक्त कार्यको नेपाल तरुण दल, अनेरास्ववियु लगायत संघ, संगठनले बिरोध जनाएका छन् । यस विषयमा बिद्यालयका प्रधानाध्यापक धर्मराज रेग्मीलाई सम्पर्क गर्दा उनले फोन उठाएनन् ।
नेपाल तरुण दल कोहलपुर नगर समिति अध्यक्ष हरि कठायतले एक विज्ञप्ती जारी गर्दै भनेका छन्, ‘नेपाली विषयको पढाई नै नहुँदा ट्रान्सक्रिप्ट प्राप्त गर्नबाट बन्चित गराइएको हुँदा शिक्षा जस्तो पवित्र संस्थामा रचनात्मक ढंगले मिलाई बिद्यार्थीको भविष्य सुनिश्चित गर्नको लागि तरुण दल जोडदार माग गर्दछ ।’
परीक्षालाई कारण देखाई बिद्यार्थीलाई भ्रमित पार्ने शैलीप्रति घोर भर्सना गर्दै घटनालाई भित्र भित्रै दवाउने कुनियतका साथ काम र प्रयास गरेमा यसको सशक्त प्रतिवाद गरिने तरुण दलको चेतावनी छ । ‘यसबाट उत्पन्न हुने परिस्थितीको जिम्मेवार सम्बन्धित निकाय हुने समेत जानकारी गराईन्छ,’ विज्ञप्तीमा भनिएको छ ।
यस्तै अनेरास्ववियुले विद्यार्थीको समस्याको समाधान नगरे कडा आन्दोलन गर्ने चेतावनी दिइसकेको छ । अनेरास्ववियुका लुम्बिनी प्रदेश अध्यक्ष टेकेन्द्र मल्ल, सोही संगठनका बाँकेस्थित कार्यवाहक अध्यक्ष इन्द्र बस्नेत, कोहलपुर नगर अध्यक्ष युवराज बुढा, जिल्ला कमिटी सदस्य पवन कार्की लगायतले ज्ञापनपत्र बुझाएका हुन् ।
