नेपालगन्ज : बाँकेको राप्ती सोनारी गाउँपालिका वडा नम्बर ४ लालपुरघाट स्थित राप्ती नदीको टापुमा फसेका पाँच जनालाई प्रहरीले सकुशल उद्धार गरेको छ । स्थानीय लालपुर गाउँको उत्तरतर्फ नदीको बीच टापुमा अवस्थित गौशालामा गाई रेखदेख गर्न गएका स्थानीय ५ जना बाढीमा फसेका थिए ।
ईलाका प्रहरी कार्यालय धामपुरको टोलीले मंगलबार दिउँसो २ बजेतिर सकुशल उद्धार गरेको हो । उनीहरु बिहानै गौशालामा गएको तर दिउँसो नदीमा एक्कासी पानीको सतह बढेपछि टापुमै फसेका थिए । उनीहरु फसेकै अवस्थामा उद्धार गरिएको ईलाका प्रहरी कार्यालय धामपुरका ईन्चार्ज प्रहरी वरिष्ठ नायव निरिक्षक लक्ष्मीप्रसाद आचार्यले जानकारी दिएका छन् ।
टापुमा फसेका राप्ती सोनारी-४ पसरामपुरका ५५ बर्षिय चुकीराम थारु, ५३ बर्षिय मायाराम थारु, ५१ बर्षिया बतासी थारु, ५० बर्षिय लोकबहादुर थारु र सोही वडाको सूर्यलालपुर गाउँ निवासी ३२ बर्षिय आशाराम थारुलाई ट्युव र सेफ्टी ज्याकेटको सहयाताले सकुशल उद्धार गरिएको प्रहरीले जनाएको छ ।
लालपुरको उत्तरतर्फ राप्ती नदीको भंगालो र बीच टापुमा रहेको नर्सरीमा गौशाला रहेको छ । राप्ती नदीमा पानीको सतह बढेपछि टापुको दक्षिणतर्फ रहेको भंगालोमा समेत बाढी आएपछि उनीहरु अलपत्र परेका थिए । गौशालामा रहेका गाईहरुको अवस्था पनि सामान्य रहेको प्रहरीले जनाएको छ ।
टापुमा फसेका आशारामले राप्ती सोनारी-४ का वडा सदस्य मंगल थारुलाई फोनमार्फत जानकारी गराएपछि प्रहरीसमक्ष सूचना पुगेको र समयमा उद्धार गर्न प्रहरी सफल भएको हो । पूर्वी क्षेत्रमा परेको अबिरल बर्षाका कारण राप्ती नदीमा मंगलबार पानीको सतह बढेर खतराको तह नजिक पुगेको छ ।
नदीमा पानीको सतह बढेपछि जिल्ला विपद व्यवस्थापन समिति बाँकेले राप्ती नदी तटीय क्षेत्रका बासिन्दालाई सतर्कता अपनाउन आग्रह गरेको छ । बाँकेका प्रमुख जिल्ला अधिकारी विपिन आचार्यले मंगलबार सूचना जारी गर्दै राप्ती नदीको बहाब एक्कासी बढेर ५.४५ मिटरभन्दा माथि पुगेकाले नदी आसपासका बासिन्दालाई सतर्कता अपनाउनुका साथै नदीमा माछा मार्ने, नुहाउने, ओहोर-दोहोर गर्ने, दाउरा संकलन गर्ने जस्ता कार्य नगर्न आग्रह गरेका छन् ।
राप्ती नदीको माथिल्लो तटीय क्षेत्रमा पछिल्लो १२ घण्टादेखि भारी वर्षा भइरहेको सूचना जल तथा मौसम विज्ञान विभागले दिएको उल्लेख गर्दै आचार्यले सतर्कता अपनाउन आग्रह गरेका हुन् । जल तथा मौसम विज्ञान विभागले यस बर्ष राप्तीको कुसुमस्थित जलमापन केन्द्रको थ्रेसहोल्ड परिवर्तन गरी सतर्कता तह ६ मिटर र खतरा तह ७.८ मिटर कायम गरेको छ ।
राप्तीको बाढीले खतराको तह पार गरेपछि राप्ती सोनारी गाउँपालिकाको बैसा, नवलपुर, सिनाबाज, लालपुर, बिनौना, फत्तेपुर, कचनापुर, टिकलीपुर तथा डुडुवा गाउँपालिकाको होलिया, चौफेरी, बेतहनी, कम्दी लगायत क्षेत्र डुब्ने गर्छन् । राप्ती सोनारी गाउँपालिकाले, बाढी र डुवानको कारण कुनै समस्या भएमा गाउँपालिकाको विपद ब्यवस्थापन सम्पर्क ब्यक्ति अथवा ९८५८०२५९८० मा सम्पर्क गर्न आग्रह गरेको छ ।
