चिनियाँ समकक्षी ली छियाङसँग आज दाहालको भेटवार्ता

राजनीति

Home
राजनीति
चिनियाँ समकक्षी ली छियाङसँग आज दाहालको भेटवार्ता

चिनियाँ समकक्षी ली छियाङसँग आज दाहालको भेटवार्ता कृषि र औद्योगिक क्षेत्रमा गरेको विकास अवलोकन गर्ने

काठमाडौं : प्रधानमन्त्री पुष्पकमल दाहाल ‘प्रचण्ड’ले सोमबार (आज) चिनियाँ समकक्षी ली छियाङसँग द्विपक्षीय वार्ता गर्ने भएका छन् । चीनको औपचारिक भ्रमणमा रहेका उनले राजधानी बेइजिङमा भेटवार्ता गर्न लागेका हुन् । चीनको औपचारिक भ्रमणका लागि प्रधानमन्त्री प्रचण्ड शनिबार चीन पुगेका थिए ।

भेटवार्तापछि प्रधानमन्त्री प्रचण्डले छोङछिङ्ग महानगरपालिकामा कृषि र औद्योगिक क्षेत्रमा गरेको विकास अवलोकन गर्ने कार्यक्रम रहेको छ । उक्त क्षेत्रमा आधुनिक कृषि प्रणालीका साथै चीनले अपनाएको आधुनिक खेती प्रणाली बारेमा पनि जानकारी लिनेछन् ।

भ्रमणको कार्यसूचीअनुसार प्रधानमन्त्री प्रचण्डले चीनको राष्ट्रिय जनकङ्ग्रेसको स्थायी समिति अध्यक्ष झाओ लेजीसँग पनि भेटवार्ता गर्नेछन् । उनले चीनस्थित नेपाली राजदूतावासले आयोजना गर्ने चीन–नेपाल लगानी सम्मेलनलाई सम्बोधन गर्नेछन् ।

सम्मेलनमा नेपाल र चीनका उद्योगी व्यवसायीहरूको सहभागिता रहनेछ । सो अवसरमा नेपाल र चीनबीच लगानीका क्षेत्र पहिचान गर्नुका साथै लगानी प्रवद्र्धनका लागि आवश्यक मार्ग प्रशस्त गरिनेछ । सम्मेलनमा सहभागिताका लागि नेपाल उद्योग वाणिज्य महासंघको नेतृत्वमा नेपालका उद्योगी व्यवसायीहरू पनि त्यहाँ पुगेका छन् ।

त्यसपछि प्रधानमन्त्री प्रचण्ड नेपालसँग सिमाना जोडिएको चीनको तिब्बत स्वशासित क्षेत्रको भ्रमणमा जानेछन् । तिब्बतमा रहँदा पनि उनले त्यहाँका उच्चपदस्थ अधिकारीसँग भेटवार्ता गर्ने कार्यक्रम छ । प्रधानमन्त्री प्रचण्ड आफ्नो प्रतिनिधिमण्डलसहित यही सेप्टेम्बर ३० मा नेपाल फर्कने कार्यक्रम छ ।

प्रकाशित मिति: सोमबार, असोज ८, २०८० ०९:४५

प्रतिक्रिया दिनुहोस्