कोहलपुर : कोहलपुर नगरपालिकाका नगर प्रमुख पूर्णप्रसाद आचार्यले आफ्नो कुशलतापूर्वक जिम्मेवारी निर्वाह गर्न नगर प्रहरीलाई निर्देशन दिएका छन् । नगर प्रहरी कर्मचारीलाई निर्देशन दिदै नगर प्रमुख आचार्यले कसैको दवावमा परेर काम गर्नुभन्दा पनि स्थानीय प्रहरी ऐनद्धारा निर्दिष्ट व्यवस्थालाई टेकेर काम गर्नुपर्ने बताए ।
‘नगर प्रहरी स्थापनापछि अहिलेसम्म नगर प्रहरीले अनुशासित, मर्यादित र जिम्मेवारपूर्ण तरिकाले काम गरेको पाइएको छ,’ उनले भने, ‘नगर प्रहरी कोहलपुरबासीको लागि ‘मेरो प्रहरी हो’ भन्ने भावना स्थापित हुने गरी काम गर्नुस् ।
राजनीतिक गन्ध कतैबाट पनि नपरोस् र पर्नु पनि हुँदैन, प्रहरी ऐनले निर्दिष्ट गरेको काम जिम्मेवारी निर्वाह गर्नुस्। कसैको दवावमा काम गर्न आवश्यक छैन ।’ कोहलपुर नगरपालिका व्यवस्थापन र संस्थागत सुशासनमा नगर प्रहरीले ठूलो भूमिका निर्वाह गरेको पनि उनको भनाइ छ ।
यस्तै नगर उपप्रमुख संगिता सुवेदीले नगर प्रहरीले कुनैपनि प्रलोभनमा नपरेर काम गरिरहेको भन्दै यसलाई सधैं कायम राख्न निर्देशन दिइन् । बजार व्यवस्थापन, न्यायिक समितिका निर्णय कार्यान्वयन, विपद व्यवस्थापन लगायतका सवालमा नगर प्रहरीले महत्वपूर्ण काम गरेको भन्दै खुसी व्यक्त गरिन् ।
यसैगरी प्रमुख प्रशासकीय अधिकृत धोलकराज ढकालले नगर प्रहरीले नगरबासीको सेवाका निमित्त इमान्दार भएको काम गर्नुपर्ने बताए । सत्यम, सेवा, सुरक्षणमको मूलमन्त्रलाई व्यवहारिक रुपमा कार्यान्वयन गरेर अघि बढ्न उनले निर्देशन दिए ।
नेपाल प्रहरीबाट भर्ना छनोट भइ तालिम प्राप्त कोहलपुर नगर प्रहरीमा प्रहरी निरीक्षक वीरबहादुर थापाको नेतृत्वमा २३ जना जनशक्ती रहेका छन् । नगर प्रहरीले बजार व्यवस्थापन, सार्वजनिक सम्पतीको संरक्षण, अतिक्रमण नियन्त्रण, सफा, स्वच्छ तथा हरित नगरको निर्माण, सुरक्षा व्यवस्थापन, सामाजिक विकृती नियन्त्रण, न्यायिक समितिको निर्णय कार्यान्वयन र विपद् व्यवस्थापन लगायतका कामलाई प्राथमिकता दिएर काम गरिरहेको नगर प्रहरी प्रमुख थापाले बताए ।
नगरपालिकालाई व्यवस्थित नगरपालिका निर्माणका लागि नगर प्रहरीले काम गरिरहेको पनि उनले जानकारी दिए । नगरपालिकालाई व्यवस्थित बनाउन नगरबासीसँग समन्वय र सहकार्य गरेर अघि बढ्ने काम नगर प्रहरीले गरिरहेको उनले बताए ।
अहिलेसम्म ९ सय ७८ वटा होडिङवोर्ड तथा फ्ल्यास वोर्ड नियन्त्रण गरी ४९ जनालाई कारवाही गरिएको र त्यसबाट एक लाख ७ हजार ८ सय ६० रुपैयाँ राजश्व संकलन भएको जानकारी दिए । फुटपाथ तथा ठेला व्यवस्थापनमा १ सय ४१ जनालाई कारवाही गरेर ७० हजार ५ सय जरिवाना गरिएको बताए । नगर विकास क्षेत्रका मापदण्ड विपरितका ४ सय ४० वटा ट्रष्ट हटाइएको नगरपालिकाले जनाएको छ ।
