नेपालगन्ज : विभिन्न समुदायका महान चार्डपर्व नजिक आइरहेका छन् । यि पर्वमा माछा र मासुको खपत अत्यधिक हुन्छ । हिन्दु धर्मावलम्बीको महान चार्ड दसैलाई माछा र मासु खाने पर्वका रुपमा पनि चित्रण गरिन्छ । दसैको मुखमा अहिले माछा र मासुको कारोबार उकालो लागिरहेको छ ।
नेपालगन्जका फ्रेस हाउसमा खान योग्य मासु र माछा छन् त ? यहाँका अधिकांस फ्रेस हाउसले गुणस्तरहिन मासु र माछा बेचिरहेका छन् । मानव स्वास्थ्यलाई प्रतिकुल असर पार्ने गरी मासु र माछा बिक्री भइरहेको पाइएको छ । संयुक्त बजार अनुगमन टोलीले बुधबार यस्तो तथ्य फेला पारेको हो ।
टोलीले खान अयोग्य गुणस्तरहिन माछा जफत गरेर नष्ट गरिसकेको छ । टोलीले नेपालगन्जका बिभिन्न स्थानमा पुगेर मासु पसलको अनुगमन गरेको थियो । अनुगमन गरिएका मध्ये केही पसहरु दर्ता बिनै सञ्चालन भएको र सरसफाई र गुणस्तरमा ध्यान नदिएको पाइएको अनुगमनमा संलग्न उपभोक्ता हित संरक्षण मञ्चका बाँके अध्यक्ष एवम् अधिवक्ता वसन्त गौतमले जानकारी दिएका छन् ।
अनुगमन टोलीले बाँके गाउँमा रहेको मासु मण्डी अनुगमनका क्रममा केही पसल दर्ता बिना सञ्चालन भएको र सरसफाईमा ध्यान नदिएको पाइएको गौतमले बताए । अनुगमन टोलीले जमुनाहा क्षेत्रमा गरेकोे अनुगमनका क्रममा खान अयोग्य माछा बिक्री गरेको फेला परेको छ । अनुगमन टोलीले गुणस्तरहिन माछा बिक्री गर्ने पसललाई आईन्दा यस्तो नगर्न निर्देशन समेत दिएको छ ।
विभिन्न पसलमा गरिएको पसलबाट अनुगमन टोलीले ४९ किलो खान अयोग्य माछा बरामद गरी नष्ट गरेको वाणिज्य, आपूर्ति तथा उपभोक्ता संरक्षण कार्यालय नेपालगन्जका प्रमुख कृष्ण प्रसाद पौडेलले जानकारी दिए ।
पसलहरुले बिना दर्ता माछा मासु पसल सञ्चालन गरेको पाइएकोले पनि तत्काल दर्ता गरेर मात्र सञ्चालन गर्न निर्दशन दिइएको उनले बताए । ‘अनुमति नलिएर सञ्चालन गरेका ३ वटा पसललाई दर्ता गरेर मात्र खोल्न भनिएको छ,’ पौडेलले भने ।
खान अयोग्य माछा मासुका कारण मानवीय स्वास्थ्यमा असर पुगेको भन्दै संयुक्त अनुगमनलाई तिब्रता दिइएको कार्यालयका सुचना अधिकारी देवीलाल चौलागाईले बताएका छन् । अनुगमनमा मासुजन्य वस्तुको स्वच्छता एवम् सरसफाइ कायम राख्न समेत निर्देशन दिइएको छ ।
मासु र माछा बजारको उपभोक्ता हित संरक्षण मञ्चका बाँके अध्यक्ष गौतम, वाणिज्य, आपूर्ति तथा उपभोक्ता संरक्षण कार्यालय नेपालगन्जका प्रमुख पौडेल, सुचना अधिकारी चौलागाई, जिल्ला प्रशासन कार्यालय बाँकेका नासु बेदेश्वर गौतम, नेपालगन्ज उपमहानगरपालिका पशु शाखाका अच्युत गौतम, भेटेरिनरी अस्पताल तथा पशु सेवा विज्ञ केन्द्र नेपालगन्जका डा. रुपेन्द्र कुमार ओली, खाद्य प्रबिधि तथा गुण नियन्त्रण कार्यालयका विवेककुमार सुवेदी लगायतले अनुगमन गरेका थिए ।
