नेपालगन्ज : लुम्बिनी प्रदेशका मुख्यमन्त्री डिल्लीबहादुर चौधरीले लुम्बिनी प्रदेश प्रहरी अस्पतालको निरीक्षण गरेका छन् । नेपालगन्जको कारकाँदोमा रहेको उक्त अस्पतालको बुधबार गतिविधि, भौतिक पुर्वाधारको स्तर, अस्पताल व्यवस्थापन सम्बन्धमा निरीक्षण तथा अनुगमन गरेका हुन् ।
सो क्रममा मुख्यमन्त्री चौधरीले अस्पतालमा कार्यरत प्रहरी कर्मचारीलाई आवश्यक निर्देशन दिए । सो क्रममा मुख्यमन्त्री चौधरीले अस्पताल र स्वास्थ्य संस्थाको स्तरोन्नती र आधुनिकीकरण लुम्बिनी प्रदेश सरकारको प्राथमिकतामा रहेको बताए ।
बिरामीको चाप र सेवा हेर्दा प्रहरी अस्पताललाई ५० शैयामा बिस्तार गर्न आवश्यक देखिएको बताए । प्रदेश प्रहरी अस्पताल १५ शैयाको रहेको छ । उक्त अस्पताल अहिलेका लागि निकै सानो र कम क्षमताको मुख्यमन्त्री चौधरीले बताए ।
उक्त अवसरमा लुम्बिनी प्रदेश प्रहरी अस्पतालका प्रमुख एवम् प्रहरी वरिष्ठ उपरीक्षक(एसएसपी) डा. अमिनकुमार श्रेष्ठले अस्पतालको गतिविधि र समस्याका बारेमा जानकारी गराएका थिए । पूर्वाधार र जनशक्ति अभावले समस्या रहेको उनले सुनाए ।
लुम्बिनी प्रदेश मात्र नभएर कर्णाली र सुदूरपश्चिमका प्रहरी कर्मचारी, प्रहरी परिवार र पूर्व प्रहरी तथा उनका परिवारका बिरामीलाई सेवा दिँदै आएको जानकारी दिए । उक्त अस्पताललाई तत्कालका लागि ५० शैयाको बनाउनुपर्ने माग गरे ।
डा. श्रेष्ठले ४२ बेडको अस्पतालको नयाँ भवन निर्माणाधीन अवस्थामा रहेको र भवन निर्माण कार्य पूरा हुने बित्तिकै ५० शैयाको अनुमति दिनुपर्ने बताए । अस्पताललाई सर्वसाधारणका लागि समेत सञ्चालन गर्ने गरी त्यहाँ रहेको करिव ४ बिघा क्षेत्रफलमा अस्पतालको स्तरोन्नती गर्नका लागि गुरुयोजना तयार गरिएको बताए ।
उक्त अस्पतालले २४ सै घण्टा आपत्कालिन सेवा, जनरल मेडिसिन, हाडजोर्नी उपचार, इन्टरनल मेडिसिन, कलेजो रोगको उपचार, नाक कान घाँटी उपचार, दाँतको विशेषज्ञ उपचारसहित सामान्य शल्यक्रिया, प्रयोगशाला, एक्सरे र फिजियोथेरापी सेवा प्रदान गर्दै आएको छ ।
यस्तै अस्पतालले छाला रोग, स्त्री रोग, सर्जरी र मानसिक रोगको उपचारका लागि आंशिक रुपमा सेवा दिँदै आएको जनाएको छ ।
तस्बिरहरु सौजन्य : लुम्बिनी प्रदेश प्रहरी अस्पताल
