बाँके(नरैनापुर) : बाँकेको प्रशिद्ध धार्मिक तथा पर्यटकीय स्थल सन्तानेश्वर महादेव मन्दिर परिसरमा सोमबार सरसफाई गरिएको छ । नरैनापुरमा रहेको उक्त मन्दिर परिसरमा नेपाल तरुण दल राप्ती सोनारीको अगुवाईमा सरसफाई गरिएको हो । सो क्रममा मन्दिर क्षेत्र वरिपरी रहेको फोहोरलाई ब्यवस्थापन गरिएको थियो । तरुण दलले उक्त मन्दिरका लागि फोहोर राख्ने दुई वटा ठुला डष्टविन समेत प्रदान गरेको छ ।
सो क्रममा नेपाली काँग्रेस बाँके क्षेत्र नम्बर १ का निर्वतमान सभापति माधवराम खत्री, राप्ती सोनारी गाउँपालिकाका संस्थापक अध्यक्ष एवम् काँग्रेका महाधिवेशन प्रतिनिधि लाहुराम थारु, काँग्रेस राप्ती सोनारी सभापति भिमबहादुर रानाक्षेत्री, तरुण दल बाँकेका अध्यक्ष बिरेन्द्र शाह, तरुण दल क्षेत्र नम्बर १ का अध्यक्ष दिग्विजय राणा, तरुण दल राप्ती सोनारी अध्यक्ष कुलबहादुर केसी लगायतले मन्दिरलाई डष्टविन हस्तान्तरण गरेका थिए ।
भिडियो रिपोर्ट हेर्नुस् :
सरसफाई कार्यक्रममा नेपाली काँग्रेसका नेताहरु, महासमिति सदस्य, महाधिवेशन प्रतिनिधि, काँग्रेसको नरैनापुर र राप्ती सोनारी गाउँपालिका एवम् वडा स्तरका कार्यसमिति पदाधिकारी लगायतको सहभागिता रहेको थियो । तरुण दल बाँकेका अध्यक्ष बिरेन्द्र शाहले तरुण दल राप्ती सोनारीले सरसफाई कार्यक्रम गरेर उदाहरणीय काम गरेको बताए । मन्दिरमा आफु पहिलो चोटी पुगेको र धार्मिक हिसाबले मन्दिर महत्वपूर्ण रहेको आफुले देखेको अध्यक्ष शाहको भनाई छ ।
तरुण दल राप्ती सोनारी अध्यक्ष कुलबहादुर केसीले सन्तानेश्वर मन्दिर परिसर सरसफाईसँगै पुजाआजा गर्ने उद्देश्यले जमघट गराइएको बताए । सरसफाईसहित मन्दिर दर्शनका लागि करिव ५५ जना जति उपस्थित भएको उनको भनाई छ । राप्ती सोनारी र नरैनापुर गाउँपालिकाबाट पार्टीका नेता तथा कार्यकर्ता र तरुण दलमा आवद्ध युवाहरुको उपस्थिती रहेको अध्यक्ष केसीले जानकारी दिएका छन् । ‘मन्दिर नरैनापुर र राप्ती सोनारीको बीचमा पर्दछ, मन्दिर परिसर फोहोर नहोस् भनेर डष्टविन उपलब्ध गराएका छौं,’ उनले भने ।
