नेपालगन्ज : न्यायका लागि भन्दै पैदल हिडेर काठमाडौं पुगेकी नेपालगन्जकी मुस्लिम महिला अधिकारकर्मी रुबी खानमाथी गम्भिर खालको अभियोग लागेको छ । उनीविरुद्द बहुबिवाह गरेको गम्भिर अभियोग लागेको हो । कानुनले बहुबिवाहलाई फौजदारी अपराध मानेको छ ।
बहुबिवाह सम्बन्धी मुद्दामा पक्राउ गरेको प्रहरीले उनलाई हिरासतमा राखेर अनुसन्धान सुरु गरेको छ । न्यायका लागि भन्दै नेपालगन्जबाट करिव २० दिन पैदल हिडेर काठमाडौं पुगेकी उनलाई नेपाल प्रहरीको सिंहदरबार वृत्तले शुक्रबार बेलुकी माइतीघरबाट पक्राउ गरेको थियो ।
रुबीलाई पक्राउ गर्नुको कारण सुरुमा नखुलाएको प्रहरीले शनिबार बेलुकी नेपालगन्ज ल्याएर बहुबिवाह मुद्दामा अनुसन्धान प्रक्रिया अगाडी बढाएको हो । ‘उहाँ(रुबी) विरुद्ध जिल्ला प्रहरी कार्यालय बाँकेमा बहुविवाह सम्बन्धी मुद्दा दर्ता थियो, अदालतबाट पक्राउ पुर्जी लिएर भदौंमा पक्राउ गरी अनुसन्धान अगाडी बढाउने हाम्रो योजना हो, तर उहाँ(रुबी) त्यसविरुद्ध अदालत जाँदा बीचमा पक्राउ गर्न समस्या भयो, अदालतमा दायर भएको रिट खारेज भएपछि अहिले पक्राउ गर्ने बाटो खुलेको हो,’ जिप्रका बाँकेका प्रवक्ता(डिएसपी) मधुसुदन न्यौपानेले भने ।
उनका अनुसार प्रहरीले उनलाई शनिबार बेलुका काठमाडौंबाट जहाजमार्फत नेपालगन्ज ल्याएर अनुसन्धान सुरु गरेको छ । अधिकारकर्मी रुबीका विरुद्ध गत भदौंमा बहुबिवाह गरेको अभियोगमा मुद्दा दर्ता भएको डिएसपी न्यौपाने बताउँछन् । प्रहरीका अनुसार मुद्दा दर्ता भइ अदालतले पक्राउ पुर्जी जारी गरेपछि रुबी प्रहरीको खोजीमा रहेको र विभिन्न केशलाई उचालेर चर्चामा आउने प्रयास गरेकी थिइन् ।
रुबीले आफुलाई बिना आधार बहुबिवाह मुद्दामा पक्राउ गर्न खोजिएको जिकिर गर्दै तुलसीपुर उच्च अदालत नेपालगन्ज इजलासमा रिट दायर गरेकी थिइन् । उनको रिटलाई यही असोज ६ गते अदालतले खारेज गरिदिएपछि पक्राउ गरिएको डिएसपी न्यौपानेले बताए । 'अदालतले रिट खारेज गर्न सक्ने शंका मानेरै रुबी न्यायका लागि भन्दै असोज १ गते यात्रामा निस्केकी थिइन्,' प्रहरी स्रोतले भन्यो ।
गत साउन ६ गते जानकी गाउँपालिका वडा नम्बर २ नेवाजी गाउँकी नन्कुन्नी धोबीको रहस्यमय मृत्यु भएको घटना र गतवर्षदेखी नेपालगन्ज उपमहानगरपालिका वडा नम्बर १७ परस्पुर निवासी निर्मला कुर्मीको अवस्था अज्ञात सम्बन्धी घटनाको प्रहरीले खोजबिन नै नगरेको भन्दै उनले बाँकेमा केहीदिन प्रर्दशनसहित काठमाडौंसम्म पुगेर आन्दोलनको नेतृत्व गरेकी थिइन् ।
काठमाडौं पुगेको भोलीपल्टै बाँके प्रहरीको आग्रहमा काठमाडौं प्रहरीले रुबीलाई पक्राउ गरेको डिएसपी न्यौपानेको भनाइ छ । खानलाई बहुबिवाह गर्ने मुस्लिम अधिकारकर्मी मोहम्मद शेर बागवानलाई पनि प्रहरीले खोजी गरिरहेको छ । घरमा श्रीमती हुँदा हुदैपनि बागवानले रुबीलाई बिवाह गरेको अभियोग लागेको छ ।
उनी मुस्लिम समाज विकास चेतना केन्द्र बाँकेको अध्यक्ष हुन् । रुबीले लामो समयदेखी सोही संस्थामा काम गर्दै आएकी थिइन् । रुबी र बागवानमाथी लागेको अभियोग पुष्टी भएमा उनीहरु दुबैलाई एक वर्षदेखी ५ वर्षसम्म कैद सजाय र १० हजारदेखी ५० हजार रुपैयाँसम्म जरिवाना हुन सक्नेछ । ‘कसैले बहुबिवाह गरेको ठहर भएमा महिला र पुरुष दुबैलाई एक वर्षदेखी ५ वर्षसम्म कैद सजाय र १० हजारदेखी ५० हजारसम्म जरिवाना हुनेछ, र बिवाह पनि स्वतः बदर हुन्छ,’ अधिवक्ता लोकबहादुर शाहले भने ।
