मोतिपुर झडपमा चार जनाको ज्यान गयो

समाज

Home
समाज
मोतिपुर झडपमा चार जनाको ज्यान गयो

मोतिपुर झडपमा चार जनाको ज्यान गयो

घटनाका घाइतेलाई अस्पताल लगिदै ।

बुटवल : रुपन्देहीको मोतिपुर औद्योगिक क्षेत्रमा जग्गा कब्जा गर्न खोज्ने सुकुम्बासीको समूह र प्रहरीबीचको झडपमा परेर ४ जनाको मृत्यु भएको छ । बुटवल उपमहानगरपालिका-१७ र १८ मा रहेको औद्योगिक क्षेत्रमा झडप भएको थियो ।

आइतबार भएको उक्त झडपमा मृत्यु हुने एक जनाको सनाखत भएको छ । मृत्यु हुनेमा कपिलवस्तुको वाणगङ्गा नगरपालिका–४ का ४८ वर्षीय रमेश परियार छन् । बाँकी तीन जनाको भने सनाखत हुन नसकेको शिक्षण अस्पतालका जनसम्पर्क अधिकृत सुशील गुरुङले जानकारी दिएका छन ।

परियारको उपचारकै क्रममा मृत्यु भएको हो । बाँकी तीन जनाको अस्पताल लैजाँदै गर्दा बाटोमा मृत्यु भएको गुरुङले बताए । अस्पतालमा अन्य पाँच प्रहरी र चार सर्वसाधारणको पनि उपचार भइरहेको छ । सो घटनामा करिब ३० जना घाइते भएका छन । घटनापछि त्यहा कर्फ्यु लगाइएको छ ।

प्रहरीले सो क्षेत्रमा अस्थायी रूपमा बनाइएका टहराहरूसमेत भत्काएको छ । सो औद्योगिक क्षेत्रको नदी उकास क्षेत्रमा गत सातादेखि ठूलो सङ्ख्यामा अस्थायी टहरा बनाएर जग्गा अतिक्रमण भएको भन्दै प्रहरीले बल प्रयोग गरेको हो ।

जग्गामा गत चैतमा औद्योगिक क्षेत्रको शिलान्यास गर्दा स्थानीयवासीले विरोध गरेका थिए । करिब २ सय बिघा जग्गा सुकुम्बासीको नाममा कब्जा गर्ने प्रयास भइरहेको थियो । विसं २०७२ चैत १ मा रुपन्देहीको मोतिपुरमा पाँच वर्षभित्र औद्योगिक क्षेत्र निर्माण गर्ने घोषणा भएको थियो ।
बुटवल उपमहानगरपालिकासहित तिलोत्तमा नगरपालिका, सियारी र शुद्धोधन गाउँपालिकासित जोडिएको तिनाउ नदी उकास क्षेत्रको सार्वजनिक जग्गामा औद्योगिक क्षेत्र बनाउनेमा सबै दलको सहमति थियो ।
यो पनि पढ्नुस : बुटवलमा सुकुम्बासीसँग झडप, अनिश्चितकालीन कर्फ्यु आदेश