बाँके (फत्तेपुर) : नेपाल रेडक्रस सोसाइटी बाँके शाखाले आफ्नो ४२ औं बार्षिक साधारण सभा शुक्रबार सम्पन्न गरेको छ । रेडक्रस राप्ती सोनारी उपशाखाको अतिथ्यतामा नेपाल राष्ट्रिय माध्यामिक बिद्यालय गुलरीमा उक्त सभा सम्पन्न गरेको हो ।
साधारण सभा उद्घाटन गर्दै रेडक्रसका केन्द्रीय अध्यक्ष प्रा. सुदर्शन प्रसाद नेपालले देशभरीका रेडक्रस स्वयं सेवकले हरक्षण मानविय सेवा प्रदान गर्दै आएको बताए । रेडक्रसको विधान संशोधन हुने क्रममा रहेको र प्रदेश स्तरीय सुझाव संकलन कार्यशाला भइरहेको उनले स्पष्ट पारे । रेडक्रसका महामन्त्री भूपतिलाल श्रेष्ठले विगतमा रेडक्रसको बैधानिकतामा आएका कठिनाई हाल समाधन भएको बताए ।
नेपालगन्ज उपमहानगरपालिकाका मेयर प्रशान्त बिष्टले सुपर कार्यक्रमद्वारा नेपालगन्जमा भइरहेको सहयोगको खुलेर प्रंशसा गरे । राप्ती सोनारी गाउँपालिका अध्यक्ष तप्तबहादुर पौडेलले विपद्को उच्च जोखिम रहेको राप्ती सोनारीमा रेडक्रसको समन्वयमा विपद् व्यवस्थापन, विपद् प्रतिकार्य योजना निर्माण र राहत व्यवस्थापन जस्ता महत्वपूर्ण कार्य भएको बताए ।
बाँकेका प्रमुख जिल्ला अधिकारी श्रवणकुमार पोखरेलले जब मानवता संकटमा हुन्छ, त्यहाँ रेडक्रस पुगेको भन्दै प्रशंसा गरे । विपद् व्यवस्थापनमा प्रशासनको सहकार्य सधैं हुने गरेको बताए । उक्त कार्यक्रममा ८ वटै स्थानीय तहलाई संस्थागत रुपमा सम्मान गरियो । वार्षिक कार्यसम्पादन मूल्यांकनका आधारमा जिल्लाका १७ वटा उपशाखा मध्ये रेडक्रसको कोहलपुर उपशाखा उत्कृष्ट भई पुरस्कृत भएको छ ।
यस्तै जुनियर तथा युवा विकासतर्फ युवा रेडक्रस सर्कल सिद्देश्वर मावि प्रथम, ज्ञानोदय मावि द्वितीय र शिवशक्ति मावि कोहलपुर तृतीय भएका छन् । उक्त सर्कललाई स्व. खेमराज श्रेष्ठ स्मृति पुरस्कार प्रदान गरिएको छ ।
यसैगरी युवा रेडक्रस सर्कल शिवशक्ति माविकी शिक्षकनायक दोर्णा वलीलाई उत्कृष्ट शिक्षक नायक पुरस्कार प्रदान गरियो । कार्यक्रममा नेरेसो बाँकेका सभापति गोवर्धन सिंह सम्झनाले बर्षभरीमा १५ लाख ७३ हजार ३४ जना रेडक्रसको सेवाबाट लाभाविन्त भएको बताए ।
रेडक्रस बाँकेका मन्त्री अजीज अहमद सिद्दिकीले आर्थिक वर्ष २०७९/२०८० को प्रगति र आगामी आर्थिक वर्ष २०८१/२०८२ को प्रस्तावित कार्यक्रम तथा कोषाध्यक्ष राकेशबहादुर श्रीवास्तवले आर्थिक वर्ष २०७९/२०८० को आय व्यय, लेखा परीक्षण प्रतिवेदन र आगामी आर्थिक वर्ष २०८१/२०८२ कोे लागि ३ करोड ७३ लाख ५२ हजार ६ सय ४६ रुपैयाँको प्रस्तावित बजेट प्रस्तुत गरे ।
रेडक्रस सोनारी उपशाखाका सभापति यज्ञनारायण शर्माको अध्यक्षतामा सम्पन्न कार्यक्रममा रेडक्रसका केन्द्रीय उपाध्यक्ष राधा नेपाली, बाँके शाखा उपसभापति शान्ति श्रेष्ठ र बागेश्वरी उपशाखा सभापति जीवनाथ सापकोटा लगायतले बोलेका थिए । यस्तै कार्यक्रम सञ्चालन रेडक्रस बाँके शाखाकी वरिष्ठ संगठन विकास अधिकृत निरञ्जना मल्लले गरेकी थिइन् । सभा स्थल आतिथ्य नेरा मावि गुलरी र सिद्देश्वर माविका बालबालिकाले नृत्य र योग अभ्यास प्रदर्शन गरेका थिए ।
