नेपालगन्ज : मोरिङ्गा फर लभ अमेरिकी सामाजिक संस्थाले जाजरकोटको भेरी नगरपालिका वडा नम्बर १ मा भुकम्पबाट ज्यान गुमाएका परिवारलाई आर्थिक सहयोग गरेको छ । उक्त संस्थाले जनही १३ हजार रुपैयाँको दरले ३१ जना परिवारलाई सहयोग गरेको हो ।
कार्यक्रममा संस्थाका निर्देशक डाक्टर प्याट्रीक चौ ले भुकम्प गएको बेला केही सामाग्री सहयोग गरेको र अहिले पीडितलाई सबैभन्दा समस्या भनेको घर चलाउने भएकाले परिवार गुमाएकालाई जति सान्त्वना दिएपनि कम हुने बताए । ‘पीडा बिस्तारै बिर्सनुपर्छ, यो नियतीको नियम हो, हामी नेपाल घुम्ने मौका परेको बेला हेमन्तराज काफलेले यहाँको वडाअध्यक्ष सँग समन्वय गर्नु भएको रहेछ ,त्यही कारण आज हामी यो वडामा आएका छौं,’ उनले भने ।
मानव भएकाले पीडामा मल्हम लगाउन आएको बताए । उक्त कार्यक्रममा अभियन्ता काफलेले सितलचिनीको फाईदा र यो लगाउने तरिका बारे चर्चा गरेका थिए । यस्तै डाक्टर दिलबहादुर तामाङले आफ्नो स्वास्थ्यलाई कसरी स्वस्थ राख्न सकिन्छ, मधुमेह रोग भनेको के हो ? किन लाग्छ र विभिन्न रोगहरु लागेर हामीलाई के कति असर पारेको छ र दैनिक आहार र व्यवहारको बारेमा प्रष्ट्याएका थिए ।
भेरी नगरपालिका वडा १ का वडाअध्यक्ष दिपक रानाले पहिलो पटक सितलचिनीको बारेमा थाहा भएको र यती धेरै महत्व बोकेको विरुवा वडामा लगाउने र मोरिङ्गा जोन वडा बनाउने बताए । उनले मोरिङ्गा फर लभले सहयोग गरेकोमा मोरिङ्गा फर लभ परिवारलाई हृदयदेखि धन्यवाद दिए ।
उक्त वडाका ५० बढी मानिसको सहभागिता रहेको उक्त कार्यक्रममा सिङ्गापुर कि जस्मिन लि ले स्वास्थ्य टिप्स दिएकी थिइन् । मोरिङ्गा फर लभ टिम ले भेरी नगरपालिकामा सितलचिनी सचेतना कार्यक्रम गरेको छ । नगरपालिकाका उपमेयर सीता गौतमले सितलचिनी निकै उपयोगी विरुवा भएको र त्यसलाई भेरी नगरपालिकाका जनतासम्म पुर्याइने प्रतिवद्धता जनाइन् ।
सितलचिनी अभियानमा सँगै हुने बताउँदै आउँदो जेठ र असार महिनामा सितलचिनीका विरुवा नगरभरी लगाउने अभियान चलाउने बताइन् ।
