नेपालगन्ज : नेपालगन्ज उपमहानगरपालिका वडा नम्बर २१ मा पर्ने विर्ता गाउँमा दुई दिनअघि एक युवकको हत्या भयो । सोही वडा निवासी अन्दाजी २० वर्षका अरबी खाँको हत्या भएको अवस्थामा शव फेला परेको थियो ।
प्रहरीका अनुसार आइतबार बिहान १० बजेतिर हत्या गरिएको अवस्थामा शव फेला परेको हो । जिल्ला प्रहरी कार्यालय बाँकेका प्रवक्ता एवम् डिएसपी डाँगीका अनुसार घाँटीमा धारिलो हतियार प्रहार गरेर हत्या गरिएको अवस्थामा खाँ को शव फेला परेको थियो ।
बाँकेको खजुरा गाउँपालिकामा सोमबार पति र पत्नी घाँटी रेटिएको अवस्थामा फेला परे । खजुरा गाउँपालिका वडा नम्बर ३ बी गाउँ मा रहेको एक घरमा घाँटी रेटिएको अवस्थामा उनीहरु फेला परेका हुन् । खजुरा बी गाउँका २९ वर्षका महेन्द्र रावत र २७ वर्षीया रिता सिंह ठकुरीको घाँटी रेटिएर रगताम्य भएको अवस्थामा फेला परेका थिए ।
जिल्ला प्रहरी कार्यालय बाँकेका प्रवक्ता एवम् डिएसपी नारायण डाँगीका अनुसार सोमबार दिउँसो सवा १ बजे खबर पाए लगत्तै धनौली प्रहरीको टोलीले उक्त कोठाको ढोका फुटाएर गम्भीर घाईते अवस्थामा रहेका महेन्द्र र रितालाई उद्धार गरेर अस्पताल पुर्याइएको थियो । नेपालगन्ज मेडिकल कलेज शिक्षण अस्पताल नेपालगन्जमा उनीहरुको उपचार भइरहेको छ ।
डुडुवा गाउँपालिका वडा नम्बर–४ मिलन चोकमा पनि दुई दिनअघि युवाहरुको समुहबीच कुटाकुट भएको छ । यही चैत १७ गते भएको उक्त घटनामा आफ्ना कार्यकर्तामाथी सांघातिक आक्रमण भएको राष्ट्रिय युवा संघ नेपालले जनाएको छ । आफ्ना कार्यकर्ता रितेश कश्यपसहित चार जना युवा आक्रमणमा परी घाईते भएको र शान्ति सुरक्षा नभएको भन्दै युवा संघ प्रहरी प्रशासन विरुद्ध आन्दोलनमा उत्रिएको छ ।
पछिल्लो तीन दिन यता मात्रै भएका यि तीन वटा घटनाले बाँकेको शान्ति, सुरक्षामाथी प्रश्न उठाएको छ । एकपछि अर्को गरी भएका यि घटनाले बाँकेबासी त्रसित भएका छन् । उनीहरुले स्थानीय प्रहरी, प्रशासनको कार्यशैलीमाथी प्रश्न उठाएका छन् ।
बाँकेमा अहिले श्रवणकुमार पोखरेलले जिल्ला प्रशासन कार्यालयको नेतृत्व गरिरेका छन् भने एसपी सुवाषचन्द्र बोहरा जिल्ला प्रहरी कार्यालय बाँकेको नेतृत्वमा छन् । केही महिनासम्म शान्त रहेको बाँकेमा अहिले भने शान्ति सुरक्षा निकै खस्केको बताइन्छ ।
