नेपालगन्ज : चाडपर्वलाई मध्यनजर गर्दै बाँकेमा शान्ति सुरक्षा र सद्भाव कायमका लाागि उच्च सतर्कता अपनाइएको सरोकारवालाले प्रतिवद्धता व्यक्त गरेका छन् । विवाद/द्धन्द्ध र जनसरोकारका सवालमा सम्वाद सहजीकरण गर्दै आएको संवाद समूह बाँकेद्धारा शान्ति, सुरक्षा र सदभाव कायममा सरोकारवालाको भूमिकाका सन्दर्भमा बुधबार नेपालगन्जमा आयोजित अन्तरक्रियात्मक सम्वाद कार्यक्रममा सो प्रतिवद्धता व्यक्त गरिएको हो ।
जिल्ला प्रशासन कार्यालय बाँकेको हलमा आयोजित कार्यक्रममा सुरक्षा निकायका प्रमुखहरुले सुरक्षा संवेदनशिलता अपनाउँदै पुर्व तयारी गरिएको स्पष्ट पारे । तिनवटै सुरक्षा निकायका प्रमुख, धार्मिक अगुवा, जनप्रतिनीधी, नागरिक समाजका अगुवा सहभागी कार्यक्रमका अधिकांस वक्ताले धार्मीक, सामाजिक सहिष्णुतालाई जिवन्त राख्न सबै पक्षबीचको समन्वयात्क सहकार्यात्मक भूमिका आवश्यक रहेकोमा जोड दिइएकोे थियो ।
बाँकेका प्रमुख जिल्ला अधिकारी सुर्यबहादुर खत्रीले शान्ति, सुरक्षा र सदभाव कायमप्रति संवेदनशिल र जिम्मेवार रहेको भन्दै सरोकार लगायत सबै पक्षको सहयोगको अपेक्षा गरे । नरैनापुर गाउँपालिका अध्यक्ष मो. इस्तियाक अहमद शाहले सकरात्मक सोंचको विकासले नै शन्ति सदभाव सुदृढ हुने भएकाले धार्मिक अगुवा पनि त्यसतर्फ केन्द्रीत हुनुपर्ने आवश्यक्ता औल्याए ।
मुस्लिम धर्म गुरु मौलाना अब्दुल जब्बार मञ्जरीले मानवको रक्षा गर्नु र एक अर्काको अस्तित्व स्वीकार्नु नै ठुलो धर्म हुने विश्वास व्यक्त गरे । ब्रम्हाकुमारी इश्वरिय विश्व विद्यालयकी ब्रम्हाकुमारी दुर्गादेवीले आध्यात्मिक चिन्तनसँगै सकरात्मक दृष्टिकोण बनाउनु नै अहिलेको प्रमुख चुनौती भएको औल्याइन् ।
बाँकेका प्रहरी प्रमुख श्यामकृष्ण अधिकारीले प्रहरीले चाडपर्वलाई लक्षित गरि विशेष सुरक्षा योजना ल्याएको भन्दै सबैको सहयोगको आवश्यक्तामा जोड दिए । बागेश्वरी मन्दिर गुठी व्यवस्थापन समितिका सचिव गोपालप्रसाद अधिकारी र सामुदायिक सेवा केन्द्र तथा सामुदायिक प्रहरी सेवा केन्द्रका अध्यक्ष दिपेन्द्रकुमार जोशीले नागरिकसँगको सहकार्यले नै शान्ति सुरक्षा कायम हुने विश्वास व्यक्त गरे ।
सम्वाद समुह बाँकेका सहजकर्ता शुक्रऋषि चौलागाईले सहजीकरण गरेको उक्त कार्यक्रमको उद्येश्य र महत्वमाथि अधिवक्ता एवम् सम्वाद सदस्य प्रहलादबहादुर कार्कीले प्रकाश पारेका थिए ।
