नेपालगन्ज : नेपाली कांग्रेसका महामन्त्री गगन थापाले २०८१ सालमा कांग्रेस नुहाई धुवाई गरेर गठबन्धनको फोहोरोबाट बाहिर निस्कनुपर्ने बताएका छन् । ‘कांग्रेसले यो नयाँ वर्षमा के संकल्प गर्ने हो भने यो भन्दा अगाडीको यात्रामा अब जति पटक चुनाव होला, बरु चुनाव हारिएला, काँग्रेसको मान्छेले अब उपरान्त रुख बाहेक अरु चुनाव चिन्हमा भोट हाल्दैन,’ उनले थपे ।
संवाद यात्राका क्रममा नेपालगन्ज आईपुगेका उनले शनिबार स्थानीय त्रिभुवन चोकमा आयोजित कार्यक्रमलाई सम्बोधन गर्दै २०८१ साल कांग्रेसका लागि मौंका भएको बताए । भने, ‘२०८० सालमा के-के भयो भनेर छलफल गरौं, समिक्षा गरौं । तर यसमै नअड्किऔं । २०८१ साल काँग्रेसका लागि मौका हो ।’ २०८१ सालभरी कांग्रेसले सरकारतिर आँखा लगाउन नहुने महामन्त्री थापाको तर्क छ ।
‘आनन्दले प्रतिक्षमा बसौं, एमाले, माओवादी, राष्ट्रिय स्वतन्त्र पार्टी लगायत को-को पार्टीलाई सरकार चलाउन दिनुपर्ने हो चलाउन दिउँ,’ उनले भने ‘पार्टीको शुद्धिकरण, पार्टीलाई शुद्ध गरौं, संगठन सुदृढ गरौं, पार्टीलाई बलियो बनाऔं, हामी गठबन्धनको फोहोरोमा जाकिएका थियौं, अब त्यसबाट बाहिर निस्कियौं ।’
कांग्रेस सरकार बाहिर बसेपनि एउटा विषयमा एमाले र काँग्रेसबीच संवाद हुन जरुरी रहेको बताए । ‘गठबन्धनको राजनीति अन्त्य गर्ने कुरामा काँग्रेस र एमाले मिलेर लड्नुपर्छ, मिल्छ सकिन्छ संविधान संशोधन गरौं, निर्वाचनको प्रणाली बदलौं, सकिदैन भने कानुन भएपनि संशोधन गरौं ।’
सरकार परिवर्तनको कुनै ठेगान नभएको बताउँदै महामन्त्री थापाले भने, ‘सरकार त कतिखेर बन्ने र कतिखेर जाने कसैलाई पनि थाहा छैन, यस्तो अवस्थामा हामीहरु छौं, एउटा सरकार आएपछि बनाउने, अर्को सरकार आएपछि फाल्ने, अहिले भूमि आयोग फाल्दिनुभयो, अदालतमा मुद्धा छ ।’ संवाद यात्राका क्रममा आफुले समुदाय स्तरका साना-साना कुरालाई पनि टिपोट गरेर राखेको बताए । यात्रा सकेपछि आफुले प्रधानमन्त्री पुष्पकमल दाहालसहित सबै दलका अध्यक्षलाई भेटेर समस्या समाधानका लागि आग्रह गर्ने बताए ।
‘मैले टिपोट गरेका कुरालाई प्रधानमन्त्री समक्ष राख्नेछु, विभिन्न पार्टीका अध्यक्षलाई भेटेर पनि राख्नेछु, संसदमा पनि बोल्नेछु,’ उनले भने ‘कही सडक बनेको छैन, कहीको कल्भर्ट बनेको छैन, सबै कुरा प्रधानमन्त्री समक्ष कुरा राख्छु र संसदमा पनि बोल्छु ।’ नेपाली कांग्रेस क्षेत्र नम्बर २ का सभापति रमेशकुमार गुप्ताको सभापतित्वमा सम्पन्न भएको कार्यक्रममा केन्द्रीय सदस्य मैकुलाल बाल्मिकी, पार्टीका लुम्बिनी प्रदेश सभापति अमरसिंह पुन लगायत नेताहरुको उपस्थिती रहेको थियो ।
सो क्रममा महामन्त्री थापासमक्ष कार्यकर्ताले जिज्ञासा तथा सुझाव दिएका थिए । महामन्त्री थापाले संवाद यात्राका क्रममा शनिबार नै बाँकेको क्षेत्र नम्बर २ स्थित कम्दीमा पनि समुदाय स्तरका नागरिकसँग संवाद गरेका थिए ।
