बाँके(बैजनाथ) : बैजनाथ गाउँपालिका वडा नम्बर ४ मा एमाले छाडेर ४ दर्जन बढी कांग्रेसमा प्रवेश गरेका छन ।नेपाली कांग्रेस बैजनाथ ४ ले आयोजना गरेको कार्यक्रममा उनीहरू प्रवेश गरेका हुन् ।
नेपाली कांग्रेस बैजनाथ गाउँपालिका वडा नम्बर ४ का सभापति सुरेश चन्दको सभापतित्वमा भएको कार्यक्रममा एमालेका स्थानीय नेता हस्तबहादुर थापा सहित ४१ जना प्रवेश गरेको कांग्रेसका युवा नेता अमर बिसीले जानकारी दिए ।
कांग्रेसमा प्रवेश हुनेमा अमृता थापा, पृथ्वी थापा, देवबहादुर थापा, नैसरा थापा, कमला थापा, शृजना थापा, तुले बुढा, पानसरा बुढा, गिता बुढा, पदमा थापा, सेतु थापा, भिमबहादुर थापा, हस्तबहादुर थापा, नैनिदेबी थापा, इन्द्रा थापा, गिता थापा, लक्ष्मी थापा, अमृता भण्डारी, सीता रोकाय, सीता थापा, कमला बुढा, रुपा परियार, तिलकन बुढा, शशी देवी बुढा सहित ४१ जना रहेको वडा सदस्य समेत रहेका युवा नेता कर्ण कठायतले जानकारी दिए ।
नव प्रवेशीलाई कार्यक्रमका प्रमुख अतिथी एवम नेपाली कांग्रेसका युवा नेता महासमिति सदस्य मेघराज ओली, क्षेत्र नम्बर ३ का सभापति नकि खाँ, महाधिवेशन प्रतिनिधि देवबहादुर खत्री, गाउँपालिका उपाध्यक्ष निर्मला रोकाय, बाँके प्रदेश सभा ३ 'क' का सभापति केशव शाह, गाउँपालिका सभापति देवबहादुर केसी, वडा नम्बर ४ का वडाअध्यक्ष प्रेम शाहीले खादा तथा अविर लगाएर पार्टीमा स्वागत गर्दै सदस्यता प्रदान गरे ।
पार्टी प्रवेश कार्यक्रमलाई सम्बोधन गर्दै महासमिति सदस्य ओलीले जनताको जीवन स्तरलाई माथी उठाउँदै लोकतान्त्रिक ब्यवस्थाको संस्थागत विकासका लागि नेपाली कांग्रेसले आफुलाई सधै अग्रमोर्चा उभ्याएको बताए । नेपाली कांग्रेसले मुलुकलाई समृद्ध बनाउन बाटो घाटो, फुल पुलेसा, शैक्षिक संस्था, विद्युत, सिचाइँ, खानेपानी, संचार, स्वास्थ्य लगायत जनजिविकाका सवालमा प्रत्यक्ष प्रभाव पार्ने विकास निर्माणमा सधै आफुलाई खरो रुपमा उतारेको युवा नेता ओलीले दाबी गरे ।
महासमिति सदस्य ओलीले पार्टीको आन्तरिक जीवनमा जे जस्ता अप्ठ्यारा दिन आएता पनि कांग्रेसले मुलुक, लोकतन्त्र र जनतालाई धोका दिने काम नगरेको उल्लेख गर्दै जनताको जीवन स्तर र भूगोलको यथार्थ चित्रलाई हृदयगम गर्दै नीति निर्माण गर्ने क्रममा कांग्रेसले आफुलाई देश र जनताको हितमा केन्द्रित गरेको कुरामा जोड दिए ।
बाँके क्षेत्र नम्बर ३ का सभापति खाँले नेपाली कांग्रेसले झुठको राजनीतिलाई प्राथमिकता नदिने बताउँदै भोटको राजनीति होइन देश र जनताको उत्थानलाई मुख्य प्राथमिकतामा राखेको बताए । पार्टीका वडा सचिव हेमराज थापाले संचालन गरेको उक्त कार्यक्रममा कांग्रेस क्षेत्र नम्बर ३ का सदस्य समेत रहेका वडा अध्यक्ष प्रेमबहादुर शाही, वडा सदस्य कर्ण कठायत लगायतले आ-आफ्नो भनाइ राखेका थिए ।
