नेपालगन्ज : लुम्बिनी प्रदेशका नवनियुक्त मन्त्री बादशा कुर्मीलाई गृहजिल्ला बाँकेमा सम्मान ग्रहण गर्न भ्याई नभ्याई भएको छ । लुम्बिनी प्रदेशको मन्त्रीमा उनले यही साउन ९ गते पद तथा गोपनियताको सपथ लिएका थिए ।
मन्त्री पदको सपथ लिए लगत्तै गृहजिल्ला आईपुगेका उनी दैनिक रुपमा पार्टी निकट तथा अन्य शुभेच्छुक संस्थाको कार्यक्रममा सम्मान ग्रहण गर्न ब्यस्त भईरहेका छन् । ‘मन्त्रीको सपथ लिएपछि म गृहजिल्ला आएको हुँ, गृहजिल्लामा आईसकेपछि धेरै ठाउँबाट दिनहुँ निमन्त्रणा आईरहेको छ, बोलाएको ठाउँमा पुगेर सम्मान ग्रहण गरिरहेको छु,’ मन्त्री कुर्मीले दूरसञ्चार डटकमसँग भने ‘म मन्त्री बनेको देखेर बाँकेबासी धेरै खुसी हुनु भएको छ ।’
आफु मन्त्री भईसकेपछि बाँकेको विकासमा सक्दो पहल गर्ने उनले बताए । मन्त्री कुर्मीले आफ्नो निर्वाचन क्षेत्र मात्र नभएर समग्र बाँकेको विकासमा ध्यान दिने प्रतिवद्धता जनाए । मन्त्री कुर्मी पद तथा गोपनियताको सपथ लिएर गृहजिल्ला आएपछि भोलीपल्ट काठमाडौं जाने तयारीमा थिए । तर, उनको सम्मानमा धमाधम कार्यक्रम हुन थालेपछि काठमाडौं जाने योजनालाई तत्कालका लागि स्थगित गरेका थिए ।
त्यसपछि सम्मान र भेटघाट कार्यक्रममा ब्यस्त भएका हुन् । स्वकिय सचिव गोविन्द कनोजियाका अनुसार मन्त्री कुर्मीको ब्यस्तता अचेल ह्वात्तै बढेको छ । ‘मन्त्री ज्यु अचेल धेरै नै ब्यस्त हुनुहुन्छ, बिहानदेखी बेलुका अबेरसम्म पनि सम्मान कार्यक्रम र भेटघाटमै ब्यस्त भईरहनु भएको छ,’ उनले भने ।
नेपाली कांग्रेस बाँकेका नेता समेत रहेका कुर्मी २०७९ सालको निर्वाचनमा बाँके प्रदेश सभा-३ ‘ख’ बाट लुम्बिनी प्रदेशको सांसदमा निर्वाचित भएका थिए । कुर्मीले तत्कालका लागि बिना विभागिय मन्त्रीको जिम्मेवारी पाएपनि केहीदिन भित्रै उनलाई मन्त्रालयको जिम्मेवारी दिइनेछ । कुर्मीले कांग्रेसका तर्फबाट प्रदेश सरकारमा सहभागी भएका मन्त्रीको नेतृत्व गरेका छन् । कुर्मीकै नेतृत्वमा कांग्रेस प्रदेश सरकारमा सहभागी भएको छ ।
मन्त्री कुर्मी अन्य दिनझै शनिबार पनि बाँकेका विभिन्न औपचारिक कार्यक्रममा समेत ब्यस्त भए । शनिबार बिहान भेरी अस्पतालको वार्षिक उत्सवमा सहभागी भएका उनी नेपाल लोकतान्त्रिक आदीवासी जनजाती महासंघ बाँके, कुर्मी (बर्मा) सहयोगी हात बाँके, पारिवारिक निजी वन संघ नेपाल लगायत विभिन्न संस्थाको कार्यक्रममा ब्यस्त भएको स्वकिय सचिव कनोजियाले जानकारी दिएका छन् ।
