नेपालगन्ज : नेपालगन्ज उद्योग वाणिज्य संघका पूर्वअध्यक्ष अच्युत प्रसाईको निधन भएको छ । स्वास्थ्यमा समस्या आई काठमाण्डौंस्थित मेडिसिटी अस्पतालमा उपचारत प्रसाईको सोमबार बिहान ६९ वर्षको उमेरमा निधन भएको हो ।
रामेछापको मन्थली नगरपालिका भटौलीमा बुवा हिरालाल प्रसाईं तथा आमा प्रेमकुमारी प्रसाईंको कोखबाट २०१२ साल असार २४ गते जन्मेका प्रसाईले विगत पाँच दशकदेखि नेपालगन्जलाई कर्मथलो बनाउदैँ आएका थिए । उनी यस क्षेत्रका व्यवसायिक, राजनीतिक, सामाजिक तथा आर्थिक धरोहरका साथै प्रजातान्त्रिक उद्योगी व्यवसायी संघ बाँकेको परिकल्पनाकार थिए ।
नेपाल उद्योग बाणिज्य महासंघका पूर्व कार्यकारणी सदस्य समेत रहेका प्रसाई २०५३ पुषदेखि २०५९ पुष सम्म नेपालगन्ज उद्योग वाणिज्य संघको अध्यक्षमा रहेर सफल र कुशल नेतृत्व गरेका थिए । देश सशस्त्र द्वन्द्वमा रहेको बेला उद्योगीहरुको नेतृत्व गर्दै पश्चिम नेपालको समग्र उद्योगी, व्यवसायी, आर्थिक तथा समाजिक क्षेत्रको सफल नेतृत्व गरेका थिए ।
उनकै पालामा एउटा कोठाबाट सुरु भएको नेपालगन्ज उद्योग वाणिज्य संघको तीन तले कार्यालय भवन निर्माण भयो । पहिलो पटक प्रसाई महासंघको केन्द्रिय सदस्य भएपछि अहिलेसम्म त्यो कार्यले निरन्तरता पाएको छ । हरेक वर्ष नेपालगन्ज उद्योग वाणिज्य संघबाट केन्द्रमा प्रतिनिधित्व हुने गरेको छ । उनी नेपाली काँग्रेस बाँकेका पूर्वकोषाध्यक्ष समेत हुन् ।
सांग्रीला विकास बैंकका पूर्वअध्यक्ष समेत रहेका उनको विभिन्न सामाजिक संघ संस्थामा नेतृत्वदायी भूमिकामा रहेर अतुलनिय योगदान रहेको छ । प्रसाईको निधन भएकोप्रति दुःख ब्यक्त गर्दै नेपालगन्ज उद्योग वाणिज्य संघले सोमबार संघ परिसरमा शोक सभा आयोजना गरेको छ ।
उद्योग वाणिज्य महासंघका केन्द्रिय सदस्य अब्दुल वाहिद मन्सुरी, संघका अध्यक्ष टंकबहादुर धामी, संघका पूर्वअध्यक्षहरु नन्दलाल बैश्य, कृष्णप्रसाद श्रेष्ठ लगायतले स्वर्गीय प्रसाईको योगदानमाथि चर्चा गर्दै उनले देखाएको पथमा हिँड्ने बताएका थिए । सो क्रममा संघका कार्यसमिति, पदाधिकारी, उद्योगी, ब्यवसायी, सञ्चचारकर्मी लगायतको उपस्थिती रहेको थियो ।प्रसाईको निधनमा संघले आफ्नो झण्डा आधा झुकाएको छ ।
