नेपालगन्ज : नेपालगन्ज उपमहानगरपालिका र ठेकेदारको चरम लापरबाहीले पश्चिम नेपालको प्रशिद्ध शक्तिपीठ बागेश्वरी मन्दिर परिसरमा रहेको ऐतिहासिक जुँगे महादेव मन्दिर र पुल स्तर उन्नतीको काम अलपत्र परेको छ । उपमहानगरपालिकाले ठोस योजना बिना नै जुँगे महादेव मन्दिर र पुल स्तर उन्नती गर्न भन्दै पुरानो संरचना भत्काएको थियो । तर, लामो समय भईसक्दा पनि पुल स्तर उन्नतीको काम हुन सकेको छैन ।
तलाउको बीचमा रहने मन्दिर र पुल स्तर उन्नती समयमा नहुँदा स्थानीय बासिन्दा तथा धार्मिक अगुवाहरुमा आक्रोश बढेको छ ।यसमा उपमहानगरपालिका र ठेकेदारको चरम लापरबाही भएको उनीहरुको भनाई छ । उपमहानगरपालिकाले प्रशिद्ध शक्तिपीठ बागेश्वरी मन्दिर परिसरमा रहेको ऐतिहासिक महत्व बोकेको जुँगे महादेवको ‘अपमान’ गरेको उनीहरुको आरोप छ । ‘जुँगे महादेवमाथी अपमान अपमान भएको छ, यसमा नेपालगन्ज उपमहानगरपालिकाको एकदमै लापरबाही देखिन्छ,’ स्थानीय ललितकुमार रौनियारले भने ।
आफुहरुले मन्दिर र पुल स्तर उन्नतीको काम छिटो सम्पन्न गर्ने विषयमा पटक–पटक उपमहानगरपालिकाको ध्यानाकर्षण गराएको उनले सुनाए । जुँगे महादेव मन्दिर र मन्दिरसम्म पुग्ने पुल स्तर उन्नतीको काम अलपत्र परेपछि सामाजिक सञ्जाल तथा विभिन्न चोक, चौतारामा पनि टिप्पणी भइरहेका छन् । नेपालगन्ज ग्यालरीका महेश श्रेष्ठले जुँगे महादेव मन्दिर र पुल स्तर उन्नतीको काम ढिलो हुनुमा उपमहानगरपालिका मुख्य जिम्मेवार रहेको सुनाए ।
सामाजिक सञ्जाल फेसबुकमा आक्रोश पोख्दै उनले भने, ‘जुँगे महादेव मन्दिरको स्तर उन्नतीको काममा ज–जसले लापरबाही गरेका छन्, यसको मुल्यांकन अवश्य हुनेछ ।’ मन्दिरको समयमा स्तर उन्नती नगरेर जुँगे महादेवलाई ‘बन्धक’ पारिएको उनको टिप्पणी छ । जीर्ण अवस्थामा रहेको मन्दिर स्तर उन्नती गरिने भएपछि त्यहाँ राखिएको ऐतिहासिक जुँगे महादेवको मुर्तिलाई बागेश्वरी मन्दिर परिसरकै एउटा कुनामा थन्क्याइएको छ । स्थानीयका अनुसार मन्दिरमा पुग्ने दर्शनार्थीले जुँगे महादेवको सहज रुपमा पुजा पाएका छैनन् ।
जुँगे महादेव मन्दिर र पुल स्तर उन्नती गर्नका लागि ठेकेदार कम्पनी ‘ग्रेटर नेपाल कन्सट्रक्सन’ नेपालगन्ज–१९, बाँकेले २०७९ चैत २ गते १ करोड ८ लाख ७३ हजार ८ सय ९९ रुपैयाँमा ठेक्का सम्झौता गरेको थियो । ठेकेदार कम्पनीले २०८० चैत २ गतेभित्र सम्पूर्ण काम सम्पन्न गरिसक्नुपर्ने भएपनि अहिलेसम्म आधा काम पनि सम्पन्न गर्न नसकेको बताइन्छ । तोकिएको समयभित्र काम सम्पन्न नभएपछि ठेकेदार कम्पनीले आगामी २०८१ पुस १ गतेसम्म म्याद पाएको छ ।
उपमहानगरपालिकाका नगर प्रमुख प्रशान्त बिष्टले मन्दिर स्तर उन्नतीको कार्य प्रगति ठिक रहेको दाबी गरे । ‘कामको प्रगति ठिक छ, यो एकदमै कठिन काम हो, बाहिरबाट बोलेको जस्तो सजिलो छैन,’ उनले भने ‘कहिले पुजाआजा, कहिले भिडभाडले गर्दा ठेकेदारले काम नै गर्न पाएको छैन ।’ तोकिएको समयभित्र काम गर्न नसकेको ठेकेदारको ठेक्का तोड्नुभन्दा म्याद थप्नु नै उचित लागेको मेयर बिष्टले सुनाए । आगामी शिवरात्रीमा दर्शनार्थीले जुँगे महादेव मन्दिरमा पुजा गर्न पाउने गरी काम सम्पन्न हुने उनले बताए ।
उपमहानगरपालिकाका इन्जिनियर भुपेन्द्र बोहराले अहिलेसम्म पुलको ढलान र पुर्वतर्फको घाट निर्माण कार्य सम्पन्न भएको जानकारी दिए । अझै तलाउको बीचमा रहेको मन्दिरको पिलर तथा छत ढलान कार्य फ्लोरिङ, रंगरोगन र अन्य फिनिसिङका काम बाँकी नै रहेको उनले बताए ।
