कोहलपुर : कृषि तथा पशुपंक्षी विकास मन्त्री रामनाथ अधिकारीले कोहलपुरमा पाउडर दुध उत्पादनका लागि आवश्यक पुर्वाधार बनाउन पहिलो प्राथमिकतामा रहेको बताएका छन् । नेपाल किसान महासंघ बाँकेले मंगलबार कोहलपुरमा गरेको कार्यक्रमलाई सम्बोधन गर्दै उनले यस्तो बताएका हुन् ।
कोहलपुरमा रहेको दुग्ध विकास आयोजनामा पाउडर दुध उत्पादन गर्नका लागि स्थानीय स्तरबाट माग भएको र कोहलपुर नगरपालिकाका मेयरले नै भेटेर आग्रह गरेको स्मरण गर्दै मन्त्री अधिकारीले आफ्नो कार्यकालमा यसलाई प्राथमिकतामा राखेको जानकारी दिए । बाँकेको खजुरामा रहेको कपास विकास समितिलाई चलायमान गराउने विषयमा पनि आफ्नो ध्यानाकर्षण भएको बताए । 'म मन्त्री भएपछि यसै जिल्लाका माननीय समेत रहनु भएका कांग्रेस सहमहामन्त्री ज्यूले कपास विकास समितिलाई पूर्ण दिनुपर्ने सुझाव दिनु भयो, यसमा मेरो ध्यानाकर्षण भएको छ,’ उनले भने ।
उनले किसानका लागि ठुलो काम गर्न नसकेपनि गलत नगर्ने ठोकुवा पनि गरे । अगाडी भने, ‘मैले कृषि मन्त्रीको जिम्मेवारी पाएको छु, अर्को कुरा मैले सिंगो कांग्रेसलाई बोकेको पनि छु, किसानका लागि ठुलो काम गर्न नसकौला, तर गलत गर्दिन, यदी मैले बद्मासी गरे भने मेरो तीन पुस्तालाई हान्छ ।’ आफुले गरेको काममा कसैलाई प्रश्न उठाउन नदिने प्रतिवद्धता जनाए । किसानका थुप्रै समस्याहरु रहेकोमा आफु जानकार रहेको भन्दै मन्त्री अधिकारीले भने, ‘किसानका समस्याहरु धेरै छन्, तत्कालै समस्या समाधान गरिदिन पाए हुन्थ्यो झै लागेको छ, तर काम गर्ने क्रममा थुप्रै अप्ठ्यारा आउँदा रहेछन् ।’
कांग्रेस बाँकेका सभापति नारायणप्रसाद गौडेलले सरकारले किसानका लागि सिचाई, मल र बीउको उचित ब्यवस्थापन गर्नुपर्नेमा जोड दिए । ‘किसानका लागि सिचाई, मल र बीउको उचित ब्यवस्थापन गरेमा किसानलाई धेरै राहत मिल्नेछ,’ उनले भने । यस्तै किसान महासंघ बाँकेका अध्यक्ष लाहुराम थारुले रासायनिक मल लिनका लागि किसानहरु पैसा लिएर उभिएर खाली हात घर फर्किनुपर्ने अवस्था रहेको सुनाए ।
‘सरकारले किसानका लागि समयमै मलखाद र सिचाईका लागि पानीको ब्यवस्था गर्न सक्योे भने धेरै राहत मिल्छ,’ उनले भने । अहिले किसानहरुले बिचौलियाबाट धान बिक्री गर्नु परिरहेको अध्यक्ष थारुले दुखेसो पोखे । ‘सरकारले गरेको निर्णय अनुसार किसानले धानको मुल्य पाइरहेका छैनन्,’ उनले भने ।
उक्त कार्यक्रममा किसान महासंघ लुम्बिनी प्रदेशका अध्यक्ष रिता केसी, कोहलपुर नगरपालिकाका उपप्रमुख संगिता सुवेदी, किसान महासंघका केन्द्रीय सदस्य रमेश रावल लगायतले पनि बोलेका थिए । सो क्रममा नेपाल किसान महासंघ बाँकेका उपाध्यक्ष टेकबहादुर खड्काले स्वागत गरेका थिए । कार्यक्रममा किसान महासंघका पूर्वअध्यक्ष भानुभक्त भट्टराईलाई सम्मान समेत गरिएको सचिव महेन्द्र मल्ल ठकुरीले जानकारी दिए ।
कार्यक्रममा सहभागी हुन मंगलबार बिहान काठमाडौंबाट नेपालगन्ज आईपुगेका मन्त्री अधिकारीले कोहलपुरस्थित दुग्ध विकास आयोजना, कृषि अनुसन्धान निर्देशनालय खजुरा र कोषेबाली अनुसन्धान कार्यालय खजुराको स्थलगत निरीक्षण गरेर आवश्यक निर्देशन दिए । मन्त्री अधिकारीलाई बाँकेस्थित किसान, सहकारी संस्था तथा दुग्ध ब्यवसायीले ज्ञापन पत्र बुझाएका थिए । उनी मंगलबार बेलुका नै काठमाडौं फर्केका छन् ।
