नेपालगन्ज : नेपालगन्जमा मंगलबार बिहान एउटा अपत्यारिलो खबर बाहिरियो, ‘संविधान सभा सदस्य एवम् नेपाली कांग्रेसका अगुवा नेता अब्दुल हमिद सिद्धिकी ‘भोला’ को हृदयघातबाट निधन ।’
सामाजिक सञ्जालमा एक्कासी फैलिएको यो खबर धेरैलाई अपत्यारिलो लागिरहेको थियो । तर, नेपालगन्ज उपमहानगरपालिका वडा नम्बर ४ गणेशपुरका स्थायी बासिन्दा ६० वर्षिय सिद्धिकीले सदाका लागि यस संसारलाई छाडिसकेका थिए । उनको सोमबार राति नेपालगन्ज मेडिकल कलेज शिक्षण अस्पताल नेपालगन्जमा निधन भयो ।
घरमा सुतिरहेका उनलाई एक्कासी हृदयघात भएपछि परिवारका सदस्यले अस्पताल पुर्याएका थिए । अस्पताल पुर्याए लगत्तै चिकित्सकले मृत घोषणा गरे । स्वर्गिय सिद्धिकी २०७० सालमा भएको दोस्रो संविधानसभामा समानुपातिक सभासद भएका थिए । मुस्लिम समुदायमा नेपाली कांग्रेसको संगठन बिस्तार गर्न र कांग्रेसको उपस्थितीलाई मजबुद गराउनमा सिद्धिकीले खेलेको भूमिका महत्वपूर्ण रहेको कांग्रेस नेताहरु बताउँछन् ।
स्वर्गिय सिद्धिकीको पुरानो अन्तर्वार्ता :-
सिद्धिकीको निधनप्रति नेपाली कांग्रेस बाँकेले शोक बक्तब्य जारी गरेको छ । सभापति नारायणप्रसाद गौडेलले हस्ताक्षर गरेको बक्तब्यमा भनिएको छ, ‘उहाँ एक कर्मठ, अनुशासित र इमान्दार नेता हुनुहुन्थ्यो, कांग्रेस बाँकेले एक जना जुझारु नेता गुमाएको छ, हामी निकै दुःखी छौं ।’ सभापति गौडेलले सिद्दिकीको निधनले पार्टीलाई अपूरणीय क्षति भएको बताएका छन् ।
कांग्रेस बाँकेले सिद्धिकीको सम्मानमा मंगलबार पार्टी कार्यालय बन्द गर्नुका साथै आधा झण्डा झुकाएको सचिव सुधांशु कोइरालाले जानकारी दिए । कांग्रेस नेता सिद्धिकी प्रष्ट वक्ताका रुपमा चिनिन्थ्ये । राष्ट्र, राष्ट्रियता र लोकतन्त्रप्रति बफादार रहेका उनी अत्यन्त सरल ब्यक्ति थिए । शिरमा सधैं ढाकाको टोपी लगाउने उनको यो स्वभावले राष्ट्रियताप्रतिको बफादारितालाई प्रष्ट रुपमा झल्काउँथ्यो ।
संविधान सभा सदस्य सिद्धिकीको निधनप्रति दुःख ब्यक्त गर्दै नेपालगन्ज उपमहानगरपालिकाले मंगलबार आधा दिन कार्यालय बन्द गरेको थियो । सिद्धिकीको मंगलबार अपरान्ह ४ बजे नेपालगन्जको साहबास्थित कब्रस्तानमा मुस्लिम परम्परा अनुसार अन्त्येष्टी गरिएको छ ।
अन्त्येष्टीका क्रममा राष्ट्रिय सभाका सदस्य युवराज शर्मा, नेपाली कांग्रेसका केन्द्रिय सदस्य मैकुलाल बाल्मिकी, पूर्वमन्त्री एवम् नेकपा माओवादीका नेता महेश्वरजंग गहतराज अथक, कांग्रेस बाँकेका सभापति नारायणप्रसाद गौडेल, लुम्बिनी प्रदेशका पूर्वमन्त्रीद्धय बादशाह कुर्मी र सुरेन्द्र हमाल, पार्टीका विभिन्न तहका नेता तथा कार्यकर्ता, पत्रकार, साहित्यकार, मुस्लिम समुदायका अगुवा, परिवारका सदस्य तथा आफन्त लगायतको उपस्थिती रहेको थियो ।
