वैकुण्ठधाम महोत्सवको आय ब्यय सार्वजनिक : तीन करोड संकलन, खर्च ७५ लाख

समाज

Home
समाज
वैकुण्ठधाम महोत्सवको आय ब्यय सार्वजनिक : तीन करोड संकलन, खर्च ७५ लाख

वैकुण्ठधाम महोत्सवको आय ब्यय सार्वजनिक : तीन करोड संकलन, खर्च ७५ लाख

आय ब्यय सार्वजनिक गर्दै बैकुण्ठधाम आध्यात्मिक महोत्सव आयोजक समितिका पदाधिकारी । तस्बिर : भगतराम थारु

नेपालगन्ज : बैकुण्ठधाम आध्यात्मिक महोत्सवको आय ब्यय सार्वजनिक गरिएको छ । महोत्सवको मुल आयोजक सिधनियाघाट वैकुण्ठधामले शुक्रबार पत्रकार सम्मेलन गरी आय व्यय विवरण सार्वजनिक गरेको हो । जस अनुसार महोत्सवबाट ३ करोड ३ लाख १५ हजार ४ रुपैयाँ संकलन भएको र ७५ लाख ७ हजार ३ सय ७७ रुपैयाँ खर्च भएको पाइएको छ ।

खर्च कटौती पश्चात २ करोड २८ लाख ७ हजार ६ सय २७ रुपैयाँ बचत भएको समितिका कोषाध्यक्ष कृष्णप्रसाद श्रेष्ठले जानकारी दिए । समितिले गत कात्तिक २२ देखि ३० गतेसम्म नेपालगन्जको रामलिला मैदानमा महोत्सव आयोजना गरेको थियो । कोषाध्यक्ष श्रेष्ठका अनुसार एक करोड ४५ लाख ९७ हजार ४ सय २८ रुपैयाँ नगद प्राप्त भएको छ, भने ६० लाख ४४ हजार ४७ रुपैयाँ घोषणा भएपनि दाताले भुक्तानी गरेका छैनन् ।

यस्तै २१ लख ६६ हजार १ सय ५२ रुपैयाँको विभिन्न मितिका चेक प्राप्त भएका छन् । ‘चेक क्रमशः खातामा जम्मा गर्नेछौं,’ श्रेष्ठले भने । नेपालगन्ज उपमहानगरपालिकाका नगर प्रमुख प्रशान्त बिष्टले डुडुवा गाउँपालिका वडा नम्बर ४ मा एक कठ्ठा र नेपालगन्ज उपमहानगरपालिका वडा नम्बर १८ का वडाअध्यक्ष दीपक बर्माले नेपालगन्ज–१९ मा एक कठ्ठा ६ धुर जग्गा दान गरेको पनि कोषाध्यक्ष श्रेष्ठले जानकारी दिए ।

महोत्सव मूल समारोह समितिका संयोजक डा. सुरेशकुमार कनोडियाले अझै २ करोड रुपैयाँ उठाउने लक्ष्यका साथ छलफल चलिरहेको बताए । ‘महोत्सव सम्पन्न गर्न प्रत्यक्ष र अप्रत्यक्ष रुपमा सहयोग गर्ने सबैलाई म समितिको तर्फबाट धन्यवाद दिन चाहन्छु,’ उनले भने ‘सबैको सहयोगले महोत्सव सम्पन्न भएको हो ।’

महोत्सव र वैकुण्ठधाम निर्माण अभियानलाई आलोचना र कडा टिप्पणी गर्नेहरुलाई पनि उनले धन्यवाद दिए । संयोजक कानोडियाले शुक्रबार देखी नै महोत्सव सम्पन्न गर्नका लागि गठन गरिएका १ सय १० उपसमिति र सचिवालयलाई विघटन गरिएको जानकारी दिए ।

प्रकाशित मिति: शुक्रबार, मंसिर १४, २०८१ १९:५२

प्रतिक्रिया दिनुहोस्