नास्ता पसलबाट मनग्य आम्दानी

समाज

Home
समाज
नास्ता पसलबाट मनग्य आम्दानी

नास्ता पसलबाट मनग्य आम्दानी

नेपालगन्ज : बैजनाथ–६, बनकटवाका ४३ वर्षीय अंकित पुनको दैनिकी अचेल नास्ता पसलमै बित्ने गरेको छ । स्थानीय सम्झना बजारमा उनले सञ्चालन गरिरहेको पसलको नाम हो, (आर प्लस ए) एलजिबिटीआईक्यु नास्ता पसल । जुन पसलले श्रीमती र आफ्नो नामसहित यौनिक तथा लैंगिक अल्पसंख्यक समुदायको भावनालाई प्रतिनिधित्व गरिरहेको छ ।

पसल सञ्चालक अंकितले सोही समुदायको प्रतिनिधित्व गरिरहेका छन् । सुरुमा छोरीको यौन अंग लिएर जन्मेका उनी जब १२ वर्षको उमेरमा पाइला टेके, उनलाई पुरुषतिर होईन, महिलाप्रति आकर्षण बढ्न थाल्यो । तर, आफ्नो पहिचानका लागि उनले धेरै नै संघर्ष गर्नुपर्यो ।

करिब १५ वर्षपछि २०८० सालमा उनको पारिवारिक पुनर्मिलन भयो । स्थानीय सम्झना बजारमा उनले नास्ता पसल खोले । नास्ता पसलमा अचेल ग्राहकको भिड नै लाग्छ । नास्ता पसल नै अहिले परिवारको खर्च धान्ने आधार बनेको छ । आफ्नै कमाइबाट नेपालगन्जको राँझा र बैजनाथको सम्झना बजारमा उनले दुई वटा घडेरी जोडेका छन् ।

कालिकोटकी एक महिलासँग अंकितको दाम्पत्य जीवन पनि चलिरहेको छ । ‘आफ्नै गाउँमा बसेर व्यवसाय गर्न सकेको छु र आत्मनिर्भर बन्न पाएकोमा खुसी छु,’ उनले भने । अंकितका अनुसार नास्ता पसलबाट मासिक रुपमा सरदर डेढ लाख रुपैयाँ बराबर आम्दानी हुने गरेको अंकितले सुनाए । पसलबाट भएको आम्दानीबाट गाउँमा राम्रो पक्की घर बनाउने उनको योजना छ । ‘पसल ठिकै चलिरहेको छ, पसलको आम्दानीबाट गाउँमा पक्की घर बनाउने योजना छ,’ अंकितले भने ।

प्रकाशित मिति: मंगलबार, मंसिर १८, २०८१ १५:३०

प्रतिक्रिया दिनुहोस्