नेपालगन्ज : नेपाल पत्रकार महासंघ बाँकेमा नविन गिरीको नेतृत्व निर्वाचित भएको छ । नेपाल प्रेस युनियन लुम्बिनी प्रदेशका महासचिव समेत रहेका उनलाई प्रेस चौतारी र युनियनबीचको गठबन्धनले अगाडी सारेको थियो । गिरीले निकटतम प्रतिस्पर्धी प्रेस सेन्टर नेपालका प्रदीप वाग्लेलाई ४८ मतको अन्तरले पराजित गरे ।
तीन वर्षे कार्यकालका लागि निर्वाचित भएका गिरीले १ सय १८ मत प्राप्त गरेका छन् । निकटम प्रतिस्पर्धी वाग्लेले ७० मत प्राप्त गरे । अर्का उम्मेदवार विश्वराज पछल्डंङ्याले १९ मत प्राप्त गरेका छन् । निर्वाचनमा उपाध्यक्ष (खुल्ला)मा तिलक गाउँले र रेजिना मल्लले बराबर १०२/१०२ मत प्राप्त गरेर आधा-आधा कार्यकाल सम्हाल्ने सहमति भएको छ ।
यस्तै उपाध्यक्ष(महिला) मा करुणा शाह निर्वाचित भएकी छन् । उनले निकटतम प्रतिस्पर्धी साबित्री गिरीलाई एक मतले पराजित गरिन् । शाहले १०२ मत प्राप्त गर्दा गिरीले १०१ मत प्राप्त गरेकी थिइन् । शाह यसअघि पनि महासंघ बाँकेको उपाध्यक्ष थिइन् ।यसैगरी सचिवमा प्रेस सेन्टरका कृष्ण ओलीले १०७ मत प्राप्त गरी निर्वाचित भए । उनले युनियन–चौतारी गठबन्धनका शकील अहमद कादरीलाई पराजित गरे ।
ओलीले कादरीलाई १० मतको मतान्तरले पराजित गर्दा कादरीले ९७ मत ल्याए । यसैगरी कोषाध्यक्षमा चौतरी र युनियन गठबन्धनका उम्मेदवार सुनिल रेग्मी निर्वाचित भए । रेग्मीले १२२ मत प्राप्त गर्दा उनका निकटतम प्रतिस्पर्धी विजय मल्लले ८३ मत प्राप्त गरेका छन् । निर्वाचनमा सह–सचिव (खुला)मा गठबन्धनका उम्मेदवार रबिन्द्र सिंह ठकुरीले ११४ मत प्राप्त गर्दै प्रेस सेन्टरका डिल्ली शाही र अमृता जैसी ‘निशु’ लाई पराजित गरेर निर्वाचित भए ।
गठबन्धनबाट सह–सचिव(समावेशी)मा भगतराम थारू १३६ मत प्राप्त गर्दै निर्वाचित भए । यस्तै कार्यसमिति सदस्यमा १३६ मत ल्याएर रजनी योगी (महिला सदस्य), १२८ मत प्राप्त गरेर (दलित सदस्य)मा आशा परियार, १२२ मतसहित (आदिवासी जनजाति सदस्य)मा निर्मला चौधरी तथा ११७ मत ल्याएर (अन्य समावेशी सदस्य)मा सलामत अलि शेष निर्वाचित भएका छन् ।
त्यस्तै सदस्य(खुला)मा सर्वाधिक १३१ मत ल्याएर समीरमान श्रेष्ठ, १२३ मत प्राप्त गरी कृष्णराज अधिकारी, ११८ मतसहित धना विष्ट केसी, ११७ मत ल्याएर सावित्री विश्वकर्मा, १०६ मतसहित रविन्द्र घिमिरे, १०३ मत प्राप्त गरी सम्भुप्रसाद थारु, ९१ मतसहित सजन कुमार आरसी र ८७ मत ल्याएर पहलबहादुर केसी निर्वाचित भएको प्रमुख निर्वाचन अधिकृत शरण कर्माचार्यले जानकारी दिएका छन् । कुल २ सय ४२ मतदाता संख्या रहेको बाँकेको निर्वाचनमा २ सय १८ मत खसेको थियो ।
