नेपालगन्ज : अंग्रेजी नयाँ वर्ष सन् २०२५ लाई स्वागत गर्न सिद्धार्थ होटल नेपालगन्जमा ‘न्यु एयर इभ’ विशेष साँस्कृतिक कार्यक्रम गरिएको छ । उक्त कार्यक्रममा चर्चित गायिका रचना रिमाल र गायक चक्र बमले आफ्नो प्रस्तुतीहरु देखाए ।
रचनाले आफ्ना चर्चित गितहरु ‘उनको प्रिती’, ‘मिनिरल वाटर’ लगायत करिव एक दर्जन गित प्रस्तुत गरिन् । यस्तै गायक चक्रले चर्चित गित ‘ओई काजल’, ‘पहाडिया बिग्रियो’, ‘नाच मेरी झुमा’ लगायत चर्चित गित दर्शकमाझ पस्केका थिए । रचना र चक्रको प्रस्तुतीमा रमाएका दर्शकहरुले भरपुर रुपमा मनोरञ्जन लिए ।
ओपनिङमा ‘निलिमा एण्ड द सुरुवात ब्याण्ड’ र समापनका क्रममा डिजे सेड’ को दमदार प्रस्तुती रह्यो । होटल सिद्धार्थका क्षेत्रीय प्रबन्धक केशव न्यौपानेले अंग्रेजी नयाँ वर्षलाई स्वागत गर्न स्थानीय तथा राष्ट्रिय स्तरका कलाकारको उपस्थितीमा साँस्कृतिक कार्यक्रम गरिएको बताए । कार्यक्रममा दर्शकको उपस्थिती र कलाकारको प्रस्तुतीले रौनकता छाएको उनको भनाई छ ।
कार्यक्रममा देखिएको दर्शकको उपस्थितीले हरेक वर्ष ‘न्यु एयर इभ’ कार्यक्रम गर्नमा आफुहरुलाई थप उत्साहित बनाएको होटलका मार्केटिङ म्यानेजर नवीन भट्टले बताए । होटलले हरेक वर्ष स्थानीय तथा राष्ट्रिय स्तरका चर्चित कलाकारको उपस्थितीमा नयाँ वर्ष विशेष कार्यक्रम गर्दै आएको छ । साँस्कृतिक कार्यक्रम सञ्चालन सञ्चारकर्मी समिरमान श्रेष्ठले गरेका थिए ।
होटल सिद्धार्थ नेपालगन्जकै सबैभन्दा धेरै रुम भएको चार तारे लक्जरी होटेल हो । सिद्धार्थ गु्रप अन्तर्गत देशभरका विभिन्न स्थानमा होटेल, रिसोट, रेष्टुरेन्ट, क्याफे सहित ३० वटा आउटलेटहरु सञ्चालन गर्दै आएको छ । आगामी दुई महिनाभित्रमा सिद्धार्थ कटेज धनगढी र सिद्धार्थ कटेज योगीकुटी बुटवलसँगै नेपाल बाहिर भारतको बहराइजमा तारे होटल सिद्धार्थले सेवा प्रदान गर्ने भएको छ ।
