नेपालगन्ज : तत्कालिन मधेस आन्दोलनमा शाहदत प्राप्त गरेका ब्यक्तीको सम्झनामा उपेन्द्र यादव नेतृत्वको जनता समाजवादी पार्टी, नेपालले ‘बलिदानी दिवस’ मनाएको छ । जसपासहित मधेस केन्द्रित दलले हरेक वर्ष माघ ५ गतेको दिनलाई बलिदानी दिवसका रुपमा मनाउँदै आएका छन् ।
नेपालगन्जको त्रिभुवन चोकमा आयोजित कार्यक्रममा मधेस आन्दोलनमा शाहदत प्राप्त गरेका ब्यक्तीको फोटोमा माल्यार्पण गरियो । सो क्रममा जसपा नेपालका केन्द्रिय सचिव एवम् नेपालगन्ज उपमहानगरपालिकाका उपमेयर कमरुद्धिन राई, जसपा नेपालका केन्द्रिय सदस्य एवम् लुम्बिनी प्रदेशका सांसद अम्बिका काफ्ले लगायतले सम्बोधन गरे ।
कार्यक्रमलाई सम्बोधन गर्दै सांसद काफ्लेले मधेस आन्दोलनकै कारण देशमा संघियता आएको बताइन् । संघियताका कारण देशमा तीन तहको सरकार निर्माण भएको उनको भनाई छ । ‘संघियताका कारण नागरिकले प्रत्यक्ष रुपमा तीन तहको सरकारको अनुभुति गर्न पाएका छन्, नागरिकहरु राज्यसँग प्रत्यक्ष रुपमा जोडिन पाएका छन्,’ उनले भनिन् ‘संघियताको बलले समानुपातिककको आरक्षण हुन सकेको छ, जनसंख्याको आधारमा राजनीतिक आरक्षण भएको छ ।’ मधेस आन्दोलनकै कारण लामो समयदेखी नागरिकता विहिन अवस्थामा रहेका नागरिकले नागरिकताको प्रमाणपत्र पाउन सफल भएको सांसद काफ्लेले जोड दिइन् ।
जसपा बाँकेका अध्यक्ष कौशल धोबीको अध्यक्षतामा आयोजित उक्त कार्यक्रममा पार्टीका केन्द्रिय सदस्यहरु रामकुमार यादव, बेबी तबस्सुम अन्सारी, ईस्तियाक अहमद शाह, लुम्बिनी प्रदेश उपाध्यक्ष बाबु खाँ पठान, मुख्य सचिव राजन राना, प्रदेश कार्यकारिणी सदस्य मेहेमुद अन्सारी, प्रदेश सदस्य उत्तम गुप्ता, पार्टीका जिल्लास्थित कार्यसमिति पदाधिकारी लगायतको उपस्थिती रहेको थियो । उक्त कार्यक्रम सञ्चालन जसपा नेपाल बाँकेका सचिव सुर्यलाल यादवले सञ्चालन गरेका थिए । तत्कालिन मधेस आन्दोलनका क्रममा रमेश महत्तो लगायत थुप्रै ब्यक्तीले शाहदत प्राप्त गरेका थिए ।
