बाँके (नरैनापुर) : बाँकेको नरैनापुर गाउँपालिका वडा नम्बर २ मियाँपुर्वामा मुस्लिम धर्मगुरुको सम्झनामा सोमबारबाट मेला सुरु भएको छ । विगत डेढ सय वर्षदेखि हरेक बर्ष यहाँ मेला लाग्दै आएको छ । उक्त मेलाको लुम्बिनी प्रदेश सभा सदस्य एवम् पुर्वमन्त्री कृष्णा केसी नमुनाले उद्घाटन गरिन् ।
१८ वर्षसम्म पहाडमा तपस्या गरेर बसेका तत्कालिन धर्मगुरु खलिफा नुर अहमद शाहको सम्झनामा सन् १८५७ देखि हरेक वर्ष बसन्त पञ्चमीपछि मेला लाग्दै आएको छ । नरैनापुरको मियाँपूर्वामा लाग्दै आएको उक्त मेलालाई महत्वपूर्ण धार्मिक तीर्थस्थलका रुपमा खलिफा नुर अहमद शाहको मेलालाई लिइन्छ । बाँके, बर्दिया, सुर्खेत र भारतको उत्तर प्रदेशका श्रद्धालुहरू ठूलो संख्यामा आउने भएकोले यस क्षेत्रकै ठूलो धार्मिक गन्तव्यका रुपमा उक्त मेलालाई लिने गरिएको छ ।
नरैनापुरमा सोमबार मेला उद्घाटन गर्दै प्रदेश सभा सदस्य केसीले सामाजिक सद्भाव, सँस्कार र सँस्कृतिलाई एकापसमा जोड्ने काम मेलाले गरेको बताइन् । यस्तै लुम्बिनी प्रदेश सभा सदस्य एवम् जनता समाजवादी पार्टी नेपालकी केन्द्रीय सदस्य अम्बिका काफलेले नरैनापुरको मेलाले विभिन्न समुदायलाई एकै ठाउँमा जमघट गराउने माध्यम बनाइदिएको बताइन् । यसैगरी नेपाली काँग्रेस बाँके क्षेत्र नम्बर १ का सभापति पोषणराज केसीले, सामाजिक रितिरीवाज, सम्बन्ध स्थापना, अनुशासन, मेलमिलाप, आपसी सहयोग जस्ता सम्बन्ध मेलाले विस्तार गर्ने विश्वास ब्यक्त गरे ।
त्यस्तै जसपा नेपालका लुम्बिनी प्रदेश मुख्य सचिव राजन रानामगरले अन्य ठाउँको तुलनामा नरैनापुरको मेलाले ऐतिहासिक महत्व बोकेको बताए । नरैनापुर गाउँपालिका अध्यक्ष इश्तियाक अहमद शाहले सामाजिक र धार्मिक दृष्टीले गरिएका सबै पाप नाश भएर जाने धार्मिक विश्वासले गर्दा पनि यहाँको मेलामा टाढा–टाढाबाट श्रद्धालुहरु आउने गरेको जानकारी दिए ।
नरैनापुरमा रहेको धार्मिक स्थललाई पर्यटकीय गन्तव्य रुपमा विकास गर्न आफू लागी परेको बताउँदै शाहले प्रदेश र संघीय सरकारले सहयोग गर्न जरुरी रहेकोमा जोड दिए । मेला स्थलमा रहेको खलिफा सैयद नुर अहमद शाहको मजारप्रति दर्शालुहरुको धार्मिक आस्था रहेकाले च्यादर चढाउने, भाकल हाल्नेहरूको पनि मेलामा भीड लाग्ने गरेको स्थानीय विनय दिक्षितले बताएका छन् । उक्त मेला एक सातासम्म चल्ने नरैनापुर–१ का वडाअध्यक्ष इसाक जोलाहले जानकारी दिए ।
