कोहलपुर : मानव र वन्यजन्तुबीच सह-अस्तित्व कायम गरेर मात्र पर्यापर्यटन प्रवद्र्धन गर्नुपर्ने एक कार्यक्रमका सहभागीले जोड दिएका छन् । बाँकेको कोहलपुरमा शुक्रबार आयोजित कार्यक्रममा विभिन्न क्षेत्र सम्बद्ध सरोकारवालाले यस्तो कुरामा जोड दिएका हुन् ।
वाईल्ड लाईफ कन्जरभेसन नेपालले आयोजना गरेको उक्त कार्यक्रमलाई सम्बोधन गर्दै बाँके राष्ट्रिय निकुञ्जका प्रमुख संरक्षण अधिकृत बीरेन्द्रप्रसाद कँडेलले प्रकृति र मानव बीचको सह-अस्तित्व प्रवद्र्धन गर्नका लागि सबैबीच हातेमालो हुन जरुरी रहेको बताए । ‘संरक्षण सजिलो कार्य होईन, यो सबैबीचको हातेमालोबाट मात्र सम्भव छ,’ उनले भने । प्रकृति संरक्षण गर्नका लागि प्रविधिलाई नियमित रुपमा प्रयोग गर्न सक्नुपर्ने बताए ।
संरक्षणको काम गरिरहँदा वन्यजन्तु र जनताको चेपुवामा रहेको प्रमुख संरक्षण अधिकृत कँडेलको भनाई छ । मानव र वन्यजन्तु बीच सह-अस्तित्व कायम गर्नका लागि मध्यवर्ती क्षेत्रका स्थानीयलाई जिविकोपार्जनमा सहभागी गराउन आवश्यक रहेको बताए । बाँके राष्ट्रिय निकुञ्ज मध्यवर्ती क्षेत्र ब्यवस्थापन समितिका अध्यक्ष गेहेन्द्रकुमार खड्काले द्धन्द्ध र पर्यापर्यटनलाई सँग-सँगै ब्यवस्थापन गर्नुपर्ने बताए । बाँके राष्ट्रिय निकुञ्जभित्र पर्यटकीय गन्तब्य थुप्रै भएको बताउँदै भने, ‘विचारले मात्र पर्यटन प्रवद्र्धन हुदैन, कामको परिणाम देखिनुपर्छ ।’
कोहलपुर मध्यवर्ती क्षेत्र ब्यवस्थापन समितिका अध्यक्ष ओमप्रकाश ओलीले मानव र वन्यजन्तुबीच सह-अस्तित्व कायम गराउने कार्यमा स्थानीय सरकार पनि जोडिनुपर्ने बताए । ‘स्थानीय सरकारले आफ्नो नीति तथा कार्यक्रम बनाउँदा मानव-वन्यजन्तु द्धन्द्ध न्यूनिकरण र पर्यापर्यटन प्रवद्र्धनलाई पनि समेट्नुपर्छ,’ उनले भने ।
वाईल्ड लाईफ कन्जरभेसन नेपालकी सन्जिवनी योञ्जनले प्रकृति र मानव बीच सह-अस्तित्व कायम नहुँदा थुप्रै घटनाहरु भइरहेको बताइन् । प्रकृति र मानव बीच सह-अस्तित्व कायम गर्नका लागि संरक्षणका कार्यक्रमसँगै स्थानीय बासिन्दालाई पनि जिविकोपार्जनमा जोड्न जरुरी रहेको बताइन् ।
नेचर गाईड एशोसियशन बाँकेका अध्यक्ष भिम डाँगीले स्थानीय समुदायमा अझैपनि संरक्षणबारे चेतनाको कमी रहेको बताए । संरक्षणको काममा स्थानीयलाई जागरुक बनाउनुपर्ने उनको भनाई छ । बाँके राष्ट्रिय निकुञ्जभित्र पर्यटकलाई घुमाउने संरचना बनेपनि पर्याप्त मात्रामा प्रचार प्रसार हुन नसकेको डाँगीले बताए ।
कार्यक्रममा गाभर भ्याली होमस्टेका ब्यवसायी कृष्णलाल चौधरीले पर्यापर्यटन प्रवद्र्धनका सम्भावनाहरु विषयक प्रस्तुतीकरण गरेका थिए । कार्यक्रममा बैजनाथ गाउँपालिका वडा नम्बर १ का वडाअध्यक्ष रुपबहादुर मल्ल, बैजनाथ गाउँपालिकाका योजना शाखा प्रमुख डोटी नेपाली, देउराली हरियाली मध्यवर्ती सामुदायिक वन समुहका अध्यक्ष लोकेन्द्रबहादुर खत्री लगायतले पनि बोलेका थिए ।
