नेपालगन्ज : नेपाली कांग्रेसका नेता डा. शेखर कोइरालाले देश अत्यन्तै अप्ठ्यारो परिस्थितीबाट गुज्रिरहेको बताएका छन् । नेपाली कांग्रेस बाँकेले आइतबार बिहान पार्टी कार्यालयमा आयोजना गरेको कार्यकर्ता भेटघाटलाई सम्बोधन गर्दै प्रमुख अतिथी कोइरालाले कांग्रेस र एमालेको दुई तिहाईको सरकारलाई असफल हुने छुट नरहेको बताए ।
‘हामीले यो सरकारलाई सफल बनाएरै छाड्नुर्पेन आवश्यकता छ, यो सरकार बन्दाखेरी उहाँहरुले केही सम्झौता गर्नु भएको थियो, नेपाली कांग्रेस र एमालेका शिर्ष नेताहरुले केही सम्झौता गर्नु भएको थियो, संविधान सुधारका कुरा, आर्थिक अवस्थालाई सुधार गर्ने कुरा, सुशासन कायम गर्ने यो तिन वटा कुरा हामीले गर्नैपर्नेछ,’ उनले भने ‘नत्र काँग्रेस र एमालेको सरकार औचित्यहिन सावित हुन दिनुहुन्न हामीले, नेपाली कांग्रेसका साथीहरुले यो सरकारलाई सफल बनाएरै छाड्नुपर्ने आवश्यकता छ ।’
कांग्रेस र एमालेको सरकार बनेको यति समय हुँदा पनि जनताले चाहेका कुरा पुरा हुन नसकेको डा. कोइरालाको बुझाई छ । ‘कांग्रेस कार्यकर्ताले सोचेका कुरा अगाडी बढ्न सकेको छैन, सुशासनमा कुनैपनि ईम्प्रुमेन्ट भएको छैन, आर्थिक अवस्था नाजुग छ भन्ने कुरा तपाईहरुले सुनिरहनु भएको छ, पढिरहनु भएको छ, मिडियाले लेखिराखेको छ,’ उनले थपे ।
कांग्रेस बाँकेका सभापति नारायणप्रसाद गौडेलको सभापतित्वमा सम्पन्न भएको कार्यकर्ता भेटघाटमा उपसभापति गोपालप्रसाद अधिकारीले स्वागत गरेका थिए, भने कार्यक्रम सञ्चालन सचिव सुधान्सु कोइरालाले गरेका थिए । नेता कोइरालाले आइतबार नै नेपाली कांग्रेस राप्ती सोनारीको सम्मेलन उद्घाटन गर्ने भएका छन् । कांग्रेस राप्ती सोनारीले डा. कोइरालाको प्रमुख आतिथ्यतामा राप्ती सोनारी-२ मदुईमा सम्मेलन गर्दैैछ ।
