नेपालगन्ज : युवालाई स्वदेशमै प्रसस्त सम्भावना रहेको कुरा ‘म नागरिक म बनाउँछु नेपाल’ कार्यक्रममा निस्कर्ष निकालिएको छ । नेपाल रिपब्लिक मिडिया लिमिटेडले नेपालगन्जमा आयोजना गरेको सो कार्यक्रममा बोल्ने बक्ताहरुले स्वदेशमै पढाई र रोजगारीको वातावरण सिर्जना गर्नका लागि राज्यको नीतिसँगै पाठ्यक्रममा परिवर्तन ल्याउनुपर्नेमा जोड दिए ।
कार्यक्रमका प्रमुख वक्ता एवम् नेपाली कांग्रेसका नेता डा. शेखर कोइरालाले नेपालको शिक्षा नीति, शिक्षा प्रणाली र पाठ्यक्रमलाई परिवर्तन गरेपछि मात्र त्यो कुरा सम्भव रहेको प्रष्ट पारे । विद्यार्थीलाई स्वदेशमा पढाई सँग–सँगै रोजगारीको पनि अवसर सिर्जना गरिनुपर्ने उनको भनाई थियो । ‘एजुकेशनलाई पढाई र गराईमा समन्वय गरिएन भने तबसम्म अप्ठ्यारो अवस्था आउँछ, शिक्षाको नीति र पाठ्यक्रम परिवर्तन गर्नुपर्ने हुन्छ,’ उनले भने ।
अबको दश वर्षसम्म देशमा धेरै कुराको विकास हुने सम्भावना देखिएको बताए । ‘अबको दश वर्षमा हामीहरुले २८ हजार मेगावाट बिद्युत उत्पादन गर्ने लक्ष्य लिएका छौं, हामी सक्छौं भन्ने अठोटका साथ काम गर्नुपर्ने हुन्छ,’ उनले भने । नेपाल रिपब्लिक मिडियाका प्रबन्ध निर्देशक समृद्धि ज्ञवालीले देश बनाउने जिम्मेवारी नै युवाको काँधमा रहेको बताइन् । ‘यो देशहामीले नै बनाउँने हो, तपाई हामी युवाले नै बनाउने हो,’ युवा युवतीलाई उत्साहित गराउँदै उनले भनिन् । युवाले देश नबनाएर कसले बनाउने भन्दै उनले प्रश्न समेत गरिन् ।
राज्यले युवा जनशक्तीलाई स्वदेशमै रहने गरी नीति बनाउनुपर्नेमा उनको जोड छ । आफु स्नातकोत्तर तह अध्ययनको शिलशिलामा केही वर्ष विदेश जानुपरेको अनुभव सुनाउँदै भनिन्, ‘म अध्ययनको लागि मात्रै विदेश गएकी थिए, अध्ययन सकेपछि म तुरुन्तै नेपालमै केही गर्नुपर्छ, नेपाल मैले बनाउनुपर्छ भनेर फर्किएँ ।’ नेपालमा पनि सिप, क्षमता अनुसार रोजगारी पाउने प्रसस्त सम्भावना रहेको प्रबन्ध निर्देशक ज्ञवालीको धारणा छ ।
यस्तै महिला उद्यमी महासंघ नेपालका अध्यक्ष शोभा ज्ञवालीले नेपालमै सम्भावना देखेर उत्साहका साथ गाउँदेखी शहरसम्मका महिलाहरू उद्यमशील बनिरहेको बताइन् । महिलाहरू गाउँदेखि शहरसम्म साना-साना उद्योग चलाएर आत्मनिर्भर बनिरहेको उनले सुनाइन् । ‘जनघनत्वका हिसाबले महिलाहरुले अवसर त्यति पाएका त छैनन्, तर सम्भावना यो देशमा एकदमै धेरै छ, महिला दिदी बहिनीले आ-आफ्नो क्षेत्रमा एकदमै राम्रोसँग आफ्नो उद्यमलाई अगाडी बढाएका छन्,’ नेपाल रिपब्लिक मिडिया लिमिटेडका निर्देशक समेत रहेकी महासंघ अध्यक्ष ज्ञवालीले भनिन् ।
यसैगरी सिद्धार्थ गु्रप अफ हस्पिटालिटीका अध्यक्ष लक्ष्मण न्यौपानेले नेपालमै रोजगारीको प्रसस्त सम्भावना रहेको बताए । सिद्धार्थ ग्रुपले ‘पढाई र गराई’ लाई सँग-सँगै अगाडी बढाउँने नीति अगाडि सारेको उनले प्रष्ट पारे । ‘हामीले नपढ्नेलाई पनि पढ भनेर प्रोत्साहित गर्छौ, पढाई छोडेकालाई पनि तिमी पढाईलाई निरन्तरता देउ भनेर प्रोत्साहन गर्छौ, काम खोज्न बाहिर जानुपर्दैन, जागिर मात्र होईन, कम्पनीमा शेयर सदस्य बन्ने पनि अवसर प्रदान गरेका छौं,’ उनले भने ।
संरक्षणकर्मी मनोज गौतमले जसले अवसरको पहिचान गर्न सक्यो, उ पक्कै पनि सफल हुने बताए । ‘समस्या जति पनि छ, तर अवसरको पहिचान गर्न सक्नुपर्छ,’ उनले भने ‘हात-हातमा दुनिया छ । सूचना, प्रविधि, ज्ञान, सिप हात हातमा छ, त्यो कुरालाई पहिचान गर्न सकौं ।’ कार्यक्रम नेपाल रिपब्लिक मिडिया लिमिटेडका अध्यक्ष बिनोदराज ज्ञवालीको सभापतित्वमा भएको थियो । सो कार्यक्रममा राजनीतिक दल, प्रतिनिधि सभा र प्रदेश सभाका सांसदहरु, कलेज सञ्चालक, प्राध्यापक, नागरिक समाजका अगुवा, सञ्चारकर्मी लगायतको उपस्थिती रहेको थियो ।
