फिल्म प्रचार गर्न ‘लाज शरणम’ निर्माण पक्ष पश्चिममा

कला/साहित्य

Home
कला/साहित्य
फिल्म प्रचार गर्न ‘लाज शरणम’ निर्माण पक्ष पश्चिममा

फिल्म प्रचार गर्न ‘लाज शरणम’ निर्माण पक्ष पश्चिममा

नेपालगन्ज : चलचित्र ‘लाज शरणम’ को प्रचार–प्रसार गर्न निर्माण पक्ष नेपालगन्ज आईपुगेको छ । उक्त टोलीले यहाँका फिल्म हलमै पुगेर सञ्चारकर्मी तथा दर्शकसँग प्रत्यक्ष भेटघाट गरेको छ । उक्त चलचित्र महाशिवरात्रि पर्वको दिन यही फागुन १४ गतेबाट देशभर एकैसाथ प्रर्दशनमा आएको थियो ।

सिने रोयलमा शुक्रबार बेलुका चलचित्र पत्रकार संघ बाँकेले गरेको पत्रकार भेटघाटमा निर्माण पक्षले नेपालको दुर्गम क्षेत्रका नागरिकले भोग्नु परेको तितो यर्थाततालाई फिल्ममार्फत उजागर गरिएको जानकारी दियो । फिल्म निर्माता कम्पनी ‘जेपिटी क्रिएसन’ का कार्यकारी निर्माता एवम् कलाकार अर्जुन घिमिरे ‘पाँडे’ ले देशको दुर्गम क्षेत्रका आमनागरिकले भोग्नु परेका विविध समस्या, बेथिती लगायत कुरालाई फिल्मले समेट्ने प्रयास गरेको बताए ।

नेपालगन्ज ऐतिहासिक र ठुलो शहर भएकाले यहाँका फिल्म पारखीले लाज शरणमलाई एक पटक हेर्ने विश्वास लिए । ‘लाज शरणम प्रर्दशनमा ल्याउने क्रममा धेरै प्राविधिक समस्या आएको थियो, ति समस्यालाई सल्टाउँदै अहिले फिल्म प्रर्दशनमा रहेको छ,’ पाँडेले पत्रकार माझ भने ‘विश्वब्यापी रुपमा प्रर्दशनमा आएको फिल्म हेरेर हामीलाई हौसला प्रदान गरिदिनु होला ।’

टोलीमा फिल्मका लेखक तथा संयोजक गजित बिष्ट लगायत रहेका छन् । उनीहरुले शुक्रबार बेलुका नेपालगन्जस्थित सिने रोयल र बागेश्वरी क्युएफएक्स सिनेमा हलमा पुगेर दर्शकको प्रतिक्रिया लिएका छन् । फिल्म निर्माण टोली नेपालगन्जबाट धनगढी र सुर्खेत पनि जाने कार्यक्रम रहेको चलचित्र पत्रकार संघ बाँकेका अध्यक्ष रामचन्द्र पौडेलले जानकारी दिए ।

केन्द्रीय चलचित्र जाँच समितिले ‘लाज शरणम’ लाई प्रदर्शन अनुमति दिएसँगै देशभरका फिल्म हलमा अहिले प्रर्दशन भइरहेको छ । फिल्मको 'रनटाइम' २ घण्टा ४० मिनेट ५२ सेकेन्ड रहेको छ । समितिले केही दृश्य सच्याउँदै फिल्मलाई प्रदर्शन अनुमति दिएको थियो ।