नेपालगन्ज : नेपाली कांग्रेसका महामन्त्री गगन थापाले संविधान घोषणासँगै बनेका नीति र नियतका कारण अप्ठ्यारो अवस्था सिर्जना भएको टिप्पणी गरेका छन् । पेशागत तथा बुद्धिजीवी विभाग नेपाली कांग्रेस र नेपाल डेमोक्याट्रिक लयर्स एशोसियसनले नेपालगन्जमा शनिबार गरेको ‘संविधान संशोधन : आवश्यकता र चुनौती’ विषयक लुम्बिनी प्रदेश स्तरीय अन्तरक्रियालाई सम्बोधन गर्दै प्रमुख अतिथी समेत रहेका महामन्त्री थापाले यस्तो बताएका हुन् ।
‘कांग्रेस र एमालेको गठबन्धनको सरकार बनाउँदै गर्दा प्राथमिकताको विषय संविधान कार्यान्वयनसँग जोडिएका कानुनहरु बनाउनुपर्ने छ, ति कानुन एकदमै छिटो बनाउनुपर्नेछ, कतिपय कानुनहरु खारेज गर्नुपर्नेछ, कतिपय कानुन हाम्रो संविधानसँग बाँझिएका छन्,’ उनले भने ।
कांग्रेस–एमाले गठबन्धन सरकारको ध्यान संविधान कार्यान्वयनमै केन्द्रित रहेको महामन्त्री थापााले बताए । संविधान कार्यान्वयनसँग सम्बन्धित जतिपनि कामहरु ग्र्दा तत्कालिन प्रधानमन्त्री एवम् संविधान पिता स्वर्गिय सुशिल कोइरालालाई एक पटक स्मरण गर्नुपर्ने उनको धारणा छ ।
कांग्रेसको नेतृत्वमा शान्ति प्रक्रिया टुंगोमा पुगेसँगै संविधान बनेको र कार्यान्वयन पनि भएकाले संविधान संशोधनमा पनि कांग्रेसले अभिभावकीय भूमिका निर्वाह गर्नुपर्ने अवस्था आएको बताए । संविधान संशोधन गर्ने क्रममा सबै दललाई समेटेर अगाडी बढिने महामन्त्री थापाले जोड दिए ।
उनले थपे, ‘हामीले बनाएका नीतिहरु वा नबनाएका नीतिका कारण अप्ठ्यारा परिस्थिती सिर्जना भएका छन् वा हाम्रो नियतका कारणले गर्दा अप्ठ्यारा सिर्जना भएका छन्,’ उनले भने ‘त्यसको भारी संविधानलाई मात्र बोकाईदिएर हुदैन, नीति र नियतका कारण सिर्जना भएका समस्याको समाधान हामी संविधानबाट खोज्छौं । त्यो संविधानबाट खोजेर हुदैन, त्यसलाई हामीले नीति वा नियतबाट खोज्नुपर्छ, संविधान संशोधनको बहसमा यो कुरा प्रष्ट हुन आवश्यक छ ।’ संविधान संशोधन हुदै गर्दा निर्वाचन प्रणाली, संघियता, प्रदेशका अधिकारका हेरफेर गर्ने विषयमा ब्यापक छलफल हुनुपर्ने उनको भनाई छ ।
नेपाली कांग्रेस पेशागत तथा बुद्धिजीवी विभागका संयोजक एवम् कांग्रेस केन्द्रिय सदस्य डा. डिला संग्रौलाको अध्यक्षतामा भएको अन्तरक्रियालाई कांग्रेस सह–महामन्त्री किशोरसिंह राठौंर, केन्द्रिय सदस्य मैकुलाल बाल्मिकी, कांग्रेस लुम्बिनी प्रदेश सभापति अमरसिंह पुन, सहमहामन्त्री एवम् प्रदेश सांसद निमा गिरी, कांग्रेस बाँकेका सभापति नारायणप्रसाद गौडेल लगायतले पनि सम्बोधन गरेका थिए । कार्यक्रममा संविधान विद् काशिराज दाहालले नागरिक स्तरबाट विशेषगरी निर्वाचन प्रणाली, समावेशिता, प्रादेशिक संरचनाको विषयमा पुनरावलोकन तथा कामको समिक्षा गरेर संविधान संशोधन गरिनुपर्ने सुझाव आएको बताए ।
