जनशिद्देश्वर बहुमुखी क्याम्पसमा तालाबन्दी, फर्जी मतदाता थपेको दाबी

राजनीति

Home
राजनीति
जनशिद्देश्वर बहुमुखी क्याम्पसमा तालाबन्दी, फर्जी मतदाता थपेको दाबी

जनशिद्देश्वर बहुमुखी क्याम्पसमा तालाबन्दी, फर्जी मतदाता थपेको दाबी

बाँके (फत्तेपुर) : बाँकेको फत्तेपुरमा रहेको जनशिद्धेश्वर बहुमुखी क्याम्पसमा तालाबन्दी गरिएको छ । यही चैत ५ गते हुन गईरहेको स्ववियु निर्वाचन प्रक्रिया त्रुटिपूर्ण र मतदाता नामावलीमा भर्ना प्रक्रिया नपुर्याई फर्जी मतदाता संख्या थप र अवैधानिक भएको भन्दै संयुक्त प्यानल (नेपाल बिद्यार्थी संघ/अनेरास्ववियु)ले संयुक्त रुपमा तालाबन्दी गरेका हुन् ।

बिद्यार्थी संगठनले क्याम्पस प्रशासन तथा निर्वाचन अधिकृतको कार्यालयमा आइतबार बेलुका ताला लगाएका थिए । दुबै संगठनले संयुक्त रुपमा जारी गरेको प्रेस विज्ञप्तीमा ‘त्रुटीपूर्ण भर्ना प्रक्रियाको मतदाता संख्या एकिन नहुँदा वैधानिकपूर्ण संशोधन गरी अध्यावधिक नगर्दासम्म अनिश्चितकालीन तालाबन्दी गरिएको’ जनाइएको छ । विद्यार्थी संगठनको सहमती बेगर ताला तोडफोड भएमा क्याम्पस प्रशासन स्वयं जिम्मेवार हुने चेतावनी दिइएको छ ।

अखिल क्रान्तिकारीले क्याम्पस प्रशासनसँग मिलेर १३ जना फर्जी विद्यार्थी भर्ना गरेको उनीहरुको आरोप छ । नेविसंघ जनशिद्धेश्वर क्याम्पस इकाई सभापति एवम् स्ववियु सभापति पदका उम्मेदवार निरा थारु र अनेरास्ववियु जनशिद्धेश्वर क्याम्पस इकाई अध्यक्ष एवम् स्ववियु सचिव पदका उम्मेदवार अम्रेशकुमार कश्यपले चुनावको पुर्वसन्ध्यामा हार्ने निश्चित भएपछि अखिल क्रान्तिकारीले क्याम्पस प्रशासन र निर्वाचन अधिकृतसँग मिलेर फर्जी बिद्यार्थी भर्ना गरेको आरोप लगाए ।

राप्ती सोनारी-६ मा रहेको उक्त क्याम्पसमा यही चैत ५ गते हुन लागेको स्ववियुको निर्वाचन कार्यतालिका प्रभावित हुने संकेत देखिएको छ । निर्वाचनका लागी काँग्रेस निकट नेपाल विद्यार्थी संघ र एमाले निकट अनेरास्ववियुको संयुक्त प्यानलबाट नेविसंघकी निरा थारु तथा माओवादी केन्द्र निकट अखिल क्रान्तिकारीको तर्फबाट माया थारुले स्ववियु सभापति पदका लागि प्रतिस्पर्धा गरिरहेका छन् । निरा वर्तमान स्ववियु सभापति हुन् ।

निर्वाचन अधिकृतको कार्यालयले समस्या समाधानका लागि आइतबार बेलुका बिद्यार्थी संगठनहरुसँग बार्ता गरेकोे थियो । तर, सहमती नहुँदा नेविसंघ र अनेरास्ववियुले तालाबन्दीको विकल्प रोजेका हुन् । निर्वाचन अधिकृत सोमनाथ थारुले बाहिर हल्ला गरिएको जस्तो फर्जी विद्यार्थी भर्ना नभएको जिकिर गरे । ‘बुझाईमा फरक परेर बाहिर हल्ला चलेको मात्र हो,’ दूरसञ्चारसँग उनले भने ।

प्रकाशित मिति: आइतबार, चैत ३, २०८१ २०:५९

प्रतिक्रिया दिनुहोस्