नेपालगन्ज : नेपाल बार एशोसिएशनको केन्द्रीय आसन्न केन्द्रीय निर्वाचन प्रचारका लागि उम्मेदवारको एक टोली नेपालगन्ज आईपुगेको छ । यही चैत २३ गते बार एशोसिएशनको निर्वाचन हुदैछ । उक्त निर्वाचनका लागि दुई समुहबीच मुख्य प्रतिस्पर्धा हुदैछ । उक्त दिन बिहान ८ बजेदेखी दिउँसो ४ बजेसम्म मतदान हुनेछ ।
निर्वाचन प्रचारका लागि बृहत लोकतान्त्रिक प्रगतिशील पेशागत राष्ट्रवादी एवम् समावेशी कानून व्यवसायी समुहका उम्मेदवार नेपालगन्ज आईपुगेका हुन् । उक्त समुहमा नेपाली कांग्रेस, नेकपा एमाले निकट लगायत कानून ब्यवसायीका आस्थागत संगठन आवद्ध रहेका छन् । उक्त समुहबाट अध्यक्षमा वरिष्ठ अधिवक्ता डा. विजयप्रसाद मिश्र चुनावी मैदानमा उत्रेका छन् ।
यस्तै उपाध्यक्षहरुमा कोसी प्रदेशबाट पदमप्रसाद लिम्बु, मधेसबाट अजय शंकर झा, बागमतीबाट तेजबहादुर रावल, गण्डकीबाट भुपेन्द्र खनाल, लुम्बिनीबाट कृष्णप्रसाद पोखरेल, कर्णालीबाट विवस कुमार बस्नेत र सुदुरपश्चिम प्रदेशबाट सिद्धराज ओझा उम्मेदवार रहेका छन् । यसैगरी उपाध्यक्ष महिलामा सरस्वती श्रेष्ठ, महासचिव केदारप्रसाद कोइराला, कोषाध्यक्ष जगतबहादुर कार्की प्रतिस्पर्धामा छन् ।
त्यस्तै सदस्य (दलित)मा चिरन्जीवी तिल्क्यानी, सदस्य(मधेसी/मुस्लिम)मा सुर्यकुमार यादव, सदस्य मधेसी/मुस्लिम(खुल्ला)मा रिंकु कुमारी यादव, सदस्य आदिवासी जनजाति(उपत्यका बाहिर)मा राजकुमार श्रेष्ठ, सदस्य आदिवासी जनजाति(खुल्ला)मा मंगल सुन्दर शिल्पकार, सदस्य महिला(उपत्यका बाहिर)मा इन्दिरा आचार्य, सदस्य महिला(खुल्ला)मा रन्जिता कार्की, सदस्य खुल्ला(उपत्यका बाहिर)मा किरण पौडेल उम्मेदवार रहेका छन् ।
त्यसैगरी खुल्ला सदस्यहरुमा किरण न्यौपाने, शारदा गुरुङ, दमनबहादुर चन्द, बाबुराम अर्याल, डा. मुकुन्द अधिकारी र माधव मैनालीले प्रतिस्पर्धा गरिरहेका छन् । निर्वाचन प्रचार–प्रसारमा आएका अध्यक्ष पदका उम्मेदवार डा. मिश्रले कानून व्यवसायमा देखा परेका विकृति, विसंगति रहित न्यायपालिका निर्माणको लागि सशक्त र प्रभावकारी बार निर्माण गर्नका लागि आफुहरुको टिमलाई निर्वाचित गराउनुपर्ने बताए ।
लोकतन्त्रको सुदृढिकरणका लागि राज्य प्रणालीको सुधार आवश्यक रहेको उनको भनाई छ । उक्त समुहले नेपाल बारको संस्थागत, संरचनागत र नीतिगत सुधार गर्नका लागि आवश्यक कदम चाल्न, सशक्त प्रभावकारी एवम् कार्यमुखी बार निर्माणका लागि, बलियो बार बलियो प्रभाव र सशक्त दवावद्धारा प्रभावकारी भूमिका निर्वाह लगायत कार्य गर्नका लागि आफुहरुलाई मतदान गर्न आग्रह गरेको छ ।
कार्यक्रममा नेपाल कानुन व्यवसायी परिषद(बार काउन्सिल)का केन्द्रिय पार्षद इश्वरीप्रसाद ज्ञवाली, उच्च अदालत बार नेपालगन्जका अध्यक्ष चित्रबहादुर शाही, जिल्ला बारका अध्यक्ष मेहरसिंह खत्री, वरिष्ठ अधिवक्ताहरु, अधिवक्ताहरु लगायतको उल्लेख्य मात्रामा उपस्थिती रहेको थियो ।
