नरैनापुरको पीडामा कोहलपुर नगरपालिकाको मल्हम

समाज

Home
समाज
नरैनापुरको पीडामा कोहलपुर नगरपालिकाको मल्हम

नरैनापुरको पीडामा कोहलपुर नगरपालिकाको मल्हम

बाँके (नरैनापुर) : नरैनापुरको पीडामा कोहलपुरले मल्हम लगाएको छ । कोहलपुर नगरपालिकाले नरैनापुर-४ जयरामपुरका आगलागी पीडितलाई शुक्रबार जस्ता पाता सहयोग गरेको हो । दुई दिनअघि भएको उक्त आगलागीबाट १७ वटा घर जलेर नष्ट भएका थिए । फुसले छाएका घरमा आगलागी हुँदा करिव ८५ लाख रुपैयाँ बराबरको नोक्सानी भएको थियो ।

अत्यन्तै विपन्न समुदायका व्यक्तिहरु बसोबास रहेको जयरामपुरमा वडा कार्यालयको आग्रहपछि रंगिन जस्तापाता सहयोग गरिएको कोहलपुर नगरपालिकाका नगर प्रमुख पूर्णप्रसाद आचार्यले जानकारी दिए । ‘खाद्यान्न लत्ताकपडा सहयोग गरेर मात्रै उनीहरुले वर्षौदेखि झेल्दै आएको आगलागी समस्या समाधान नहुने देखिएपछि प्रति परिवारलाई १० वटाका दरले जस्तापाता सहयोग गरेका हौं,’ उनले भने ।

नगरपालिकाका विपद व्यवस्थापन समिति संयोजक पवित्रा थारुको नेतृत्वमा शाखा प्रमुख बीरबहादुर थापा, सदस्य लालबहादुर राना, कार्यपालिका सदस्य केशरी कुमारी रावत अग्नीपीडितकै बस्ती पुगेर शुक्रबार जस्तापाता हस्तान्तरण गरे । सो क्रममा नरैनापुर गाउँपालिका वडा नम्बर ४ का वडाअध्यक्ष मनोजकुमार शर्मा र वडा नम्बर ५ का वडाअध्यक्ष कृष्णचन्द मौर्य लगायतको सहभागिता रहेको थियो ।

जस्तापाता पाएपछि पीडितहरुले कोहलपुर नगरपालिकाप्रति आभार प्रकट गरेको शाखा प्रमुख थापाले बताए । नरैनापुर गाउँपालिकाको दमकल बिग्रेका कारण उक्त आगलागी नियन्त्रणका लागि कोहलपुरले दमकल पठाएको थियो । नरैनापुर गाउँपालिकाले बर्सेनी आगलागी घटनाको सामना गर्नु परेको छ ।

प्रकाशित मिति: शुक्रबार, चैत १५, २०८१ २१:२८

प्रतिक्रिया दिनुहोस्