कोहलपुर : कोहलपुर नगरपालिकाले निर्माण गर्न लागेको आमसञ्चार नीतिलाई कार्यान्वयनमा ल्याउन सम्वद्ध सरोकारवालाहरुसँग सुझाव संकलन गर्न छलफल सुरु गरेको छ । नेपालको संविधान (२०७२) ले सुनिश्चित गरेको सूचना तथा सञ्चारको हकका साथै प्रेस तथा अभिव्यक्तिको स्वतन्त्रतासम्बन्धी मान्यतामा आधारित रही नगरले सञ्चार नीति बनाउन थालेको हो ।
पहिलो चरणमा विहीबार नेपाल पत्रकार महासंघको सभाहलमा महासंघको कार्यसमितिसँग छलफल गरिएको कोहलपुर नगरपालिकाका प्रेस संयोजक प्रियास्मृति ढकालले जानकारी दिए । त्यसपछि कोहलपुर नगरपालिकाका क्रियाशील पत्रकार, सञ्चार उद्यमी तथा जनप्रतिनिधिहरुसँग छलफल गरिने संयोजक ढकालले बताए ।
सूचना तथा सञ्चार प्रविधिको प्रयोग, निरन्तर विकास एवम् गतिशीलताबाट उपयुक्त अवसरसँगै नीतिगत चुनौतीहरू पनि सिर्जना भइरहेकाले यसलाई थप व्यवस्थित र दिगोपनाका लागि सञ्चार नीति निर्माण गर्न थालिएको कोहलपुर नगरपालिकाका कार्यबाहक नगर प्रमुख संगिता सुवेदीले बताइन् ।
उनले भनिन्,‘सञ्चार प्रविधि क्षेत्रमा भएको गतिशीलता एवम् निरन्तर विकासद्वारा सिर्जित नीतिगत चुनौती सम्बोधन गर्न सञ्चार नीति आवश्यक छ । विवादरहित हुने गरी नीति बनाइने छ ।’ त्यहीअनुसारको भूमिका निर्वाह गर्न उनले सञ्चार नीति बनाउन गठित कार्यदललाई सुझाव पनि दिइन् । नेपाल पत्रकार महासंघ बाँकेका अध्यक्ष नवीन गिरीको संयोजकत्वमा प्रेस संयोजक ढकाल र कोहलपुर नगरपालिकाका अधिकृत आशिष वर्मा सदस्य रहने गरी सञ्चार नीति निर्माणका लागि मस्यौदा समिति बनाइएको छ ।
कार्यबाहक नगर प्रमुख सुवेदीले स्थानीय संचार क्षेत्रको प्रवद्र्धनमा विशेष प्राथमिकता दिएर नीति बनाउन सुझाव दिइन् । नेपाल पत्रकार महासंघका अध्यक्ष गिरीले सञ्चार नीतिले स्थानीय मिडियाको सवलीकरणमा सहयोगी भूमिका निर्वाह गर्ने बताए । स्थानीय सञ्चार माध्यमको प्रवद्र्धन गर्दै पत्रकारहरुको रोजगारीलाई ग्यारेन्टी गरिनु अहिलेको आवश्यकता र चुनौतीलाई नीतिले सम्वोधन गर्ने बताए ।
मस्यौदा समितिका सदस्य सचिव समेत रहेका वर्माको स्वागत मन्तव्यबाट सुरु भएको कार्यक्रमको सहजीकरण महासंघका सचिव कृष्ण वलीले गरेका थिए । कार्यक्रममा पत्रकारहरु गणेश विसु, कृष्णराज अधिकारी, आशा विक लगायतले सुझावहरु राखेका थिए ।
