वीपीको शालिकमा कालो मोसो पोतेको भन्दै बाँके कांग्रेसको भर्त्सना

राजनीति

Home
राजनीति
वीपीको शालिकमा कालो मोसो पोतेको भन्दै बाँके कांग्रेसको भर्त्सना

वीपीको शालिकमा कालो मोसो पोतेको भन्दै बाँके कांग्रेसको भर्त्सना

नेपालगन्ज : महामानव वीपी कोइरालाको शालिकमा कालो मोसो पोत्ने, कालो कपडाले ढाकेको घटनाप्रति नेपाली कांग्रेस बाँकेले भर्त्सना गरेको छ । नेपाली कांग्रेस बाँकेका सभापति नारायणप्रसाद गौडेलले एक विज्ञप्ती जारी गर्दै वीपीको शालिकमा कालो मोसो पोत्ने, कालो कपडाले ढाक्ने जस्ता अमानवीय, असहिष्णु र असभ्य हर्कत देखाएको प्रति गम्भिर ध्यानाकर्षण भएको जनाएका हुन् ।

‘आन्दोलनका नाममा देखाइएको अराजकता र उदण्डताको जति नै निन्दा गरेपनि कम हुन्छ, यस्तो हर्कतको नेपाली कांग्रेस बाँके कडा शब्दमा निन्दा गर्दै घोर भर्त्सना गर्दछ,’ विज्ञप्तीमा भनिएको छ । राजावादीहरुले निकालेको राँके जुलुसका क्रममा प्रहरी प्रशासनकै बाक्लो उपस्थितीका बीच उक्त अशोभनीय र निन्दनीय घटना भएकाले घटनामा संलग्न अराजक समुहलाई तत्काल पक्राउ गरी हदैसम्मको कारबाही गर्न कांग्रे बाँकेले प्रशासनसमक्ष माग गरेको छ । उक्त घटनाका विषयमा कांग्रेसका केन्द्रियदेखी जिल्ला स्तरका नेता एवम् कार्यकर्ताले पनि सामाजिक सञ्जालमार्फत भर्त्सना गरेका छन् ।

राप्रपाका वरिष्ठ उपाध्यक्ष रबिन्द्र मिश्र र महामन्त्री डा. धवलसम्शेर राणाको रिहाईको माग गर्दै राप्रपाले शनिबार बेलुका नेपालगन्जमा राँकेजुलुस निकालेको थियो । घटनाका विषयमा राप्रपाका स्थानीय नेताहरुको दावी भने फरक छ । राप्रपाका सहायक महामन्त्री ऋषिराज देवकोटाले सामाजिक सञ्जालमा लेखेका छन्, ‘राँके जुलुसका क्रममा प्रहरीले राको निभाउन प्रयोग गरेको पानीमा भिजाएको जुटको बोरा तानातान गर्दा उछिट्टिएर वीपीको तस्विरमा गएको, त्यसपछि प्रहरीले तुरुन्तै सजिलै निकालेको हो, त्यो भिडियोहरुमा पनि देख्न सकिन्छ ।’