‘घरबाट सकारात्मक कुरा सिकेपछि मात्र समाजलाई सिकाउन सकिन्छ’ : मन्त्री तिमिल्सेना

राजनीति

Home
राजनीति
‘घरबाट सकारात्मक कुरा सिकेपछि मात्र समाजलाई सिकाउन सकिन्छ’ : मन्त्री तिमिल्सेना

‘घरबाट सकारात्मक कुरा सिकेपछि मात्र समाजलाई सिकाउन सकिन्छ’ : मन्त्री तिमिल्सेना

कोहलपुर : लुम्बिनी प्रदेशका सामाजिक विकास मन्त्री जन्मजय तिमिल्सेनाले घरबाट सकारात्मक कुरा सिकेपछि मात्र समाजलाई सिकाउन सकिने कुरामा जोड दिएका छन् । महिला तथा बालबालिकाको क्षमता अभिवृद्धि तथा जेष्ठ नागरिक सम्मान अन्तरगत महिला तथा बालबालिकाको क्षमता अभिवृद्धि तालिमको कोहलपुरमा मंगलबार उद्घाटन गर्दै उनले जेष्ठ नागरिकलाई सबैले सम्मान गर्न सक्नुपर्ने बताए ।

पछिल्लो समयमा छोरा छोरीबाट बुवा आमाले संरक्षण नपाएको उनको भनाई छ । ‘समाज कहाँ गइरहेको छ ?’ मन्त्री तिमिल्सेनाले प्रश्न गर्दै भने । लुम्बिनी प्रदेशको सामाजिक विकास मन्त्रालयले समाज सुधारका लागि धेरै कार्यक्रम ल्याएको उनले बताए । सकारात्मक कामको सुरुवात आफ्नै घरबाट गर्नुपर्ने मन्त्री तिमिल्सेनाको सुझाव छ । जेष्ठ नागरिकलाई सम्मान गरिएन भने भोलीका दिनमा सबैले अवस्था भोग्नुपर्ने बताए ।

केन्द्रका अध्यक्ष रिजालको अध्यक्षता सम्पन्न उद्घाटन कार्यक्रममा प्रमुख अतिथी एवम् लुम्बिनी प्रदेशका सामाजिक विकास मन्त्री जन्मजय तिमिल्सेना, कोहलपुर नगरपालिकाका नगर प्रमुख पूर्णप्रसाद आचार्य, नगर उपप्रमुख संगिता सुवेदी, कोहलपुर–१४ का वडाअध्यक्ष नमप्रसाद आले, सामाजिक डिभिजन प्रमुख उद्धब श्रेष्ठ लगायतले बोलेका थिए । क्षमता अभिवृद्धि तालिममा अधिवक्ता सुनिता शर्मा र राधेश्याम चौधरीले प्रशिक्षण दिनेछन् ।

कोहलपुर नगरपालिका वडा नम्बर १४ मा रहेको राम माध्यामिक बिद्यालयमा आयोजित उक्त कार्यक्रम सुरु हुनुअघि मन्त्री तिमिल्सेनालाई कोहलपुर नगरपालिकाका नगर प्रमुख पूर्णप्रसाद आचार्य, उपप्रमुख संगिता सुवेदी, वडा नम्बर १४ का वडाअध्यक्ष नमप्रसाद आले, सामाजिक विकास डिभिजन कार्यालय नेपालगन्जका प्रमुख उद्धब श्रेष्ठ, नमुना समाज विकास केन्द्र बाँकेका अध्यक्ष टिकाराम रिजाल बिद्यालयका शिक्षक लगायतले स्वागत गरेका थिए ।