नेपालगन्ज : संघिय सरकारको प्रस्तावित विद्यालय शिक्षा विधेयकप्रति आपत्ति जनाउँदै आन्दोलित बनेका निजी विद्यालय(संस्थागत) सञ्चालकहरुले शुक्रबार नेपालगन्जमा बृहत अन्तरक्रिया गरेका छन् ।
कार्यक्रममा नेपालगन्ज उपमहानगरपालिकाका मेयर प्रशान्त विष्ट, एमाले बाँकेका अध्यक्ष निरक गुरुङ, नेपाली काँग्रेस बाँकेका सचिव सुधान्सु कोइराला, रास्वपा बाँकेका सभापति हरिपाल सिंह केसी, नेपालगन्ज उद्योग बाणिज्य संघका अध्यक्ष टंक धामी, नेपाल पत्रकार महासंघ बाँकेका अध्यक्ष नवीन गिरी, गैरसरकारी संस्था महासंघका केन्द्रिय सचिव नमस्कार शाह, नागरिक समाजका संयोजक कृष्णप्रसाद श्रेष्ठ, शिक्षक महासंघ बाँकेका उपाध्यक्ष शेखर रावत, पूर्व जिल्ला शिक्षा अधिकारी जितबहादुर शाह, अधिबक्ता विश्वजित तिवारी लगायतले बोलेका थिए ।
कार्यक्रममा बोल्ने अधिकांस बक्ताले सरकारसँग निजी विद्यालय पहिल्यै तर्सिन जरुरी नभएको बताए । शिक्षा क्षेत्रमा निजी विद्यालयको योगदानलाई सरकारले नजरअन्दाज गर्न नसक्ने उनीहरुको भनाई छ । प्याब्सन, नेशनल प्याब्सन, हिसान, अपेन, एनएमएको संयुक्त आयोजनमा गरिएको कार्यक्रम प्याब्सन बाँकेका अध्यक्ष विकास बज्राचार्यको सभापतित्वमा सम्पन्न भएको थियो । उक्त कार्यक्रममा प्याब्सनका लुम्बिनी प्रदेश सह-सचिव राजेन्द्र आचार्यले संघिय विधेयकप्रति आफुहरुको असहमतिबारे जानकारी गराएका थिए ।
निजी बिद्यालय सञ्चालकले प्रस्तावित शिक्षा विधेयकमा राखिएको १५ प्रतिशत पूर्ण छात्रवृत्तिको प्रावधान हटाउनुपर्ने, विधेयकमा उल्लेख गरिएको ‘निजी विद्यालयलाई क्रमशः गैरनाफामूलक बनाइने’ वाक्यांश हटाउनुपर्ने लगायतका माग राखेका छन् । आफुहरुको माग सुनुवाई नभए यही भदौं १८ गतेदेखि विद्यालय बन्द गर्ने घोषणा गरेका छन् ।
